Ońtústik Qazaqstan oblysynda óndiriletin otandyq taýarlar Qytaı naryǵyna shyǵarylady, dep habarlady 24.kz.
Osy maqsatta jergilikti ákimdik Úrimshi qalasynan saýda úıin ashýdy josparlap otyr. Qazir ekijaqty kelisim júrgizilip jatyr. Al oǵan deıin kásipkerler kóktemde Beıjińde ótetin úlken jármeńkege qatysady. Jergilikti taýar óndirýshiler oǵan 800 tonnaǵa jýyq un men túrli balyq ónimderin aparady.
Sonymen qatar, Shymkentte toqylǵan kilemder de shetel naryǵyna jol tartady. Sebebi, hımııalyq qospaǵa qaraǵanda tabıǵı taza ónimge degen suranys basym. Qytaı astanasynda ótetin eń iri saýda jármeńkesi 1 aıǵa sozylady.
«Bul qazir joba kúıinde ázirlenýde. Ekijaqty kelissózder júrip jatyr. Qytaılyq kompanııalarmen kelissózder júrip jatyr. Mundaı saýda úıi ashylatyn bolsa, onda bizdiń taýar óndirýshiler turaqty túrde saýda jasaýǵa múmkinshilik alady», – dedi OQO Kásipkerler palatasy dırektorynyń orynbasary Tımýr Naqypbekov.