Ulttyq Bank "Qazınvestbank" AQ salymshylarynyń depozıtterine kepildikpen ótemaqy tóleýdiń tártibin túsindirip berdi, - dep habarlaıdy Ulttyq banktiń baspasóz qyzmeti.
Baspasóz qyzmetindegilerdiń málimetinshe, teńgemen jáne shetel valıýtasymen salynǵan depozıtter, tólem kartochkalaryndaǵy jáne bank shottaryndaǵy aqsha Qazaqstannyń depozıtterge kepildik berý qorynyń kepildigimen qorǵalǵan.
"Kepildiktiń eń joǵarǵy shegi teńgemen depozıtter boıynsha 10 mıllıon teńgege deıin; shetel valıýtasyndaǵy depozıtter boıynsha 5 mıllıon teńgege deıin. Kepildik berilgen soma shegindegi mindettemeler boıynsha banktiń barlyq salymshylary men klıentteri zańnamada belgilengen merzimde ótemaqy alady: QDKQ sottyń tıisti sheshimi zańdy kúshine engen kúnnen bastap 14 jumys kúni ishinde tóleı bastaıtyny týraly habarlaıdy. Banktiń salymshylary men klıentteri QDKQ salymshylarmen esep aıyrysý úshin agent etip taǵaıyndaǵan óz qalasyndaǵy bank bólimshesine júgine alady, ótinish berip, 5 jumys kúni ishinde ótemaqy alady", - dedi Qazaqstannyń depozıtterge kepildik berý qorynyń tóraǵasy Baqyt Qoǵylov. Sondaı-aq, ol barlyq tólemderdiń sottyń sheshimi zańdy kúshine engen kúngi baǵam boıynsha teńgemen tólenetinin aıtyp ótti.
Baqyt Qoǵylovtyń aıtýynsha, QDKQ-da banktiń ótemaqy alýǵa quqyly 8 292 salymshysy men klıentiniń (jeke tulǵalardyń) 99,7 paıyzy ótemaqyny tolyq kólemde, qalǵan salymshylarynyń kepildik berilgen soma sheginde alatynyn atap ótti.
"QDKQ-nyń tólem jasaý jónindegi mindettemeleri 768 mıllıon teńgeni quraıdy. Jeke tulǵalar aldyndaǵy kepildik berilgen somadan asatyn mindettemeler jáne eseptelgen syıaqy boıynsha taratý óndirisi barysynda taratý komıssııasy esep aıyrysady - bul mindettemeler 4-kezekke jatqyzylatyn bolady. Sońǵy derekter boıynsha, Qazaqstannyń depozıtterge kepildik berý qorynyń salymshylarmen esep aıyrysýǵa arnalǵan qarajaty 500 mlrd. teńgeni quraıdy", - dep naqtylady Qoǵylov.
Aıta keteıik, "Qazınvestbank" AQ-tyń salymshylary depozıtterge kepildik berý máseleleri boıynsha qosymsha aqparatpen, jańartylǵan redaksııadaǵy zańnamamen www.kdif.kz.saıtynan tanysa alady. Mamandardyń konsýltasııasy "jedel jelidegi" 8 8000 80 10 20 nómiri boıynsha (qońyraý shalý tegin) nemese +7 (727) 291 5689 telefonymen beriledi. Barlyq máseleler boıynsha "Qazınvestbank" AQ-tyń "jedel jelidegi" +7 (727) 2619 060 (ishki 5007) telefony boıynsha, Ulttyq Banktiń Bankterdi qadaǵalaý departamentindegi +7 (727) 270 48 93 telefony boıynsha, QR Ulttyq Banki Qarjylyq qyzmetterdi tutynýshylardyń quqyqtaryn qorǵaý jáne syrtqy kommýnıkasııalar basqarmasyna +7 (727) 278 80 84 telefony boıynsha nemese «QUBOnline» mobıldi qosymshasy arqyly alýǵa bolady.
Sonymen birge salymshylar QRUB-nyń Almaty qalasy, Áıteke bı kóshesi, 67 mekenjaıyndaǵy Qoǵamdyq qabyldaý bólmesine júgine alady. Anyqtama úshin telefon+7(727) 261 9213. Qoǵamdyq qabyldaý bólmesiniń jumys isteıtin ýaqyty: kún saıyn saǵat 10:00-den 17:00-ge deıin (saǵat 12:30 -14:30 úzilis). Aldyn ala jazylý talap etilmeıdi.