2017 jyly ekonomıkalyq ósim 2 paıyzǵa artady. Bul týraly búgin N.Nazarbaevtyń qatysýymen ótken Úkimettiń keńeıtilgen otyrysynda Ulttyq ekonomıka mınıstri Tımýr Súleımenov málimdedi.
«Boljamdarymyzǵa qaramastan, osy jyldyń sońyna deıin ekonomıkanyń ósýi kem degende 2 paıyzǵa artady dep eseptep otyrmyz. Salalardyń ishinde taý ken qazý ónerkásibi 3,6 paıyzǵa, azyq-túlik ónimderin óndirý 3,2 paıyzǵa, mashına jasaý 13 paıyzǵa artýy tıis. Sonymen qatar, qandaı jaǵdaı bolmasyn aýylsharýashylyǵy – 2,5 paıyzǵa, qurylys sektory – 2,6 paıyzǵa, kólik jáne logıstıka – 4 paıyzǵa ósedi dep josparlap otyrmyz. Bul kórsetkishterge qol jetkizý úshin Ult josparyn, Sizdiń Joldaýyńyzdy, baǵdarlamalyq qujattardy júzege asyrý boıynsha jumystar atqaramyz», – dedi Tımýr Súleımenov.
«Jaqsy baıandama jasadyń. Ishki rezerv, ıaǵnı, EYDU-da biz perspektıvti josparlarymyz boıynsha bes paıyzdyq ósimge shyǵý boıynsha keliskenbiz. Sondyqtan ekonomıkanyń qaı bóligi aıtarlyqtaı ósim beredi, sony sanaýyń kerek. Ekonomıka mınıstrligi – ekonomıkaǵa ósim beretin, memleketke, Úkimetke kreatıvti ıdeıalar, usynystar beretin shtab. Túsindiń be? Sen jas mınıstrsiń, menińshe bilimiń men tájirıbeń jetedi», – dedi Elbasy.
Sonymen qatar Nursultan Nazarbaev keıbir oblys ákimderin synǵa aldy.
"Bıyl biz alǵan ret jeke seriktestiktiń qalaı jumys isteıtinin baıqap kórdik. Bireýler jaqsy jumys isteıdi, al keıbireýleri áleýmettik máselelerdi sheshý maqsatynda jeke ınvestısııalardy tartýdyń amalyn durys izdemeıdi. Keıbir oblystar men óńirlerde myńdaǵan balabaqsha men mektep salynyp jatyr, biraq qalǵan oblystarda eshqandaı jumys istelmeı jatyr. Olar kórshi oblysqa baryp, onda ne bolyp jatqanyn kórip qaıtýǵa erinedi. Al ózderi memlekettik ınvestısııaǵa ǵana súıenip, eshteńe istemeıdi", - dedi Nursultan Nazarbaev QR Ulttyq ekonomıka mınıstri Tımýr Súleımenovtiń sózine pikir bildire otyryp.