Ramazan aıy qarsańynda Almaty Ortalyq meshiti barsha qalam ustaǵan azamattar arasynda jarapazan jyrynyń jańa mátinin jazý boıynsha baıqaý jarııalaǵan bolatyn. Búgin osy baıqaýdyń nátıjesi qorytyndylanyp, jeńimpazdar marapattaldy, dep habarlaıdy Egemen.kz.
Baıqaýǵa qatysýshylarǵa Ramazan aıynyń kelgenin súıinshileý, oraza aıynyń artyqshylyǵyn jeńil túrde jetkizý, din men dástúrdiń sabaqtastyǵyn kórsetý, jarapazan aıtý ata-babadan mura bolǵan dástúr ekendigin aıtý sharttary qoıyldy.
Jaqsylyqtyń jarshysy – jarapazan
Baıqaýǵa 30-dan astam jarapazan mátini kelip tústi. Almaty qalasynyń bas ımamy Tólebı Ospan, Islam ǵylymı zertteý ınstıtýtynyń dırektory Tóráli Qydyr, Ádebıet jáne óner ınstıtýtynyń ǵylymı qyzmetkeri Baýyrjan Myrzaqul jáne taǵy basqa qazylar osy mátinder arasynan jeńimpazdardy anyqtady. Nátıjesinde birinshi orynǵa – Bilál Qýanysh (Almaty qalasy), ekinshi orynǵa – Erkebulan Qaınazar (Astana qalasy), úshinshi orynǵa Botakóz Muhıden (Astana qalasy) ıe boldy. Eń úzdik jarapazan mátini Ramazan aıynda oryndalyp, basqa jarapazan mátinderi saıtqa jarııalanady.
Jarapazan qandaı dástúr?
Aıta keteıik, baıqaý ýaqyt talabyna saı jarapazan jyryn jańa úlgide jazyp, halyqqa umyt bolyp bara jatqan jarapazan jyryn aıtý dástúrin jańǵyrtý maqsatynda uıymdastyryldy.