Áleýmettik jelide bázbireýler óziniń qaltasynan aqsha shyǵaryp jatqandaı, «osy Ýnıversıada bizge kerek pe, dańqty sportshylary joq, qaradúrsin ótip jatyr» dep kúıinedi. Meıli, aýyz óziniki ǵoı deıin deseń, osyndaı arandatýǵa kóptegen azamattarymyz senip qalady. Ýnıversıadanyń tarıhı oqıǵa ekendigin, oǵan búkil dúnıe júzi kóz tigip otyrǵandyǵyn, Qazaqstannyń mártebesi asqaqtap jatqandyǵyn eskergisi kelmeıdi. «Almaty Arenada» ótken mánerlep syrǵanaýda jarysqa túsken sańlaqtardyń tizimin bir súzip ótkende, bizdiń qyzdarǵa ońaı bolmaıtynyn túsindik. Reseı birinshilikterinde top jaryp júrgen Elena Rodıonova, Álem chempıony, Eýropa chempıony Elızabet Toqtamyshevany bylaı qoıǵanda, kók aıdynda juldyzdaı jarqyraǵan japon, koreı qyzdaryn qaıda qoıarsyz? Tipti, olar ekinshi qurammen kelgenniń ózinde eshkimge des bermeıdi.
Aıtqandaı, qysqa baǵdarlama boıynsha úzdik shyqqandar fınalǵa ótti. Munda jınaǵan upaılaryna qaraı tórt topqa bólinedi. Bizdiń qyzdar birinshi jáne ekinshi topqa tústi. Myqtylar úshinshi men tórtinshide. Máselen, bizdiń Aıza Mambekova 42,41 upaı jınasa, Elızabet Toqtamysheva 69,01, Elena Rodıonova 69,02 upaıǵa qol jetkizdi. Japon qyzdary Rıo Nıhaıa 61,90, Hınago Isobo 59,60 upaıǵa ıe boldy. Bularǵa ıtalııalyq Roberto Rodemeronyń ókshelep kele jatqandyǵyn eskersek, jeńimpazdar men júldegerlerdiń osylardyń arasynan irikteletindigi belgili bolyp qaldy.
Árıne, bul Ýnıversıadaǵa bizdiń mánerlep syrǵanaýdaǵy úkilegen úmitimiz Elızabet Tursynbaeva jasy tolmaǵandyqtan qatysa almady. Memleketimizdiń atyn talaı halyqaralyq básekelerde kókke kótergen qyzylordalyq qyzdyń esimin ákesi álemdik kınojuldyz Elızabet Teılordyń qurmetine qoıǵan eken. Bul Ýnıversıadada ese jibersek te, kelesi Ýnıversıadada Tursynbaevanyń top jararyna sendik. Al búgingi jarysqa qatysqan qyzdarymyz úshin sheberlerdiń óneri úlken mektep bolary sózsiz.
Baqtııar TAIJAN,
«Egemen Qazaqstan»
ALMATY