Qaldyq tastap, qashyp ketetinder endi jaltara almaıtyn boldy. О́skemen qalasy qaldyqtardy ǵarysh arqyly baqylaıtyn qanatqaqty jobaǵa qatysyp jatyr. Qazirgi ýaqytta oblystyq ekologııa departamentinde ǵaryshtyq aqparattarmen jumys isteıtin arnaıy bólim de qurylyp úlgergen.
-Biz tıisti aýmaqty belgilep, usynym jiberemiz. Tórt-bes kúnniń ishinde qaldyqtardyń ornalasqan jeri men kólemi kórsetilgen sýretti alamyz. Tipti, qaldyqtardyń quramy men qansha ýaqyttan beri jatqanyn bilýge de múmkindik bar, - deıdi atalǵan departamenttiń ekologııalyq baqylaý bóliminiń jetekshi mamany Raýan Musaeva.
Ǵaryshtyq baqylaý arqyly qalanyń ishi men shahardan 20 shaqyrym aýmaqtaǵy jerlerdi de sýretke túsirýge bolady. Osy málimetter negizinde departament qyzmetkerleri tekseris júrgizip, tıisti oryndarǵa shaǵym túsire alady.
Oblys ekologtary bul jobanyń aldaǵy ýaqytta beı-bereket tastalǵan qaldyqtardy ǵana emes, zańsyz salynǵan qurylystar men aǵash kesýshilerdi anyqtaýǵa da múmkindik beretinine senimdi. Departament mamandary ǵaryshtyq túsirilimderdi jaz aılarynan bastap qoldanysqa engizýdi josparlap otyr.
Azamat QASYM,
«Egemen Qazaqstan»
О́SKEMEN