«2017 jylǵy 1 qańtardaǵy jaǵdaı boıynsha Qazaqstanda «taza» ınvestısııalyq kiris úlesiniń jıyntyǵy zeınetaqy jınaqtarynyń 20%-n quraıdy». Bul týraly Biryńǵaı jınaqtaýshy zeınetaqy qorynyń janyndaǵy Qoǵamdyq keńestiń kezekti otyrysyndaǵy «Zeınetaqy sektorynyń qazirgi ahýaly jáne zeınetaqy aktıvterin basqarý týraly» baıandamasynda Qazaqstan Ulttyq Banki Tóraǵasynyń orynbasary D. Ǵalıeva habarlady, dep jazady Ulttyq banktiń baspasóz qyzmeti.
D. Ǵalıeva «zeınetaqy qorlarynyń kirisi búkil álemde halyqaralyq qor naryqtaryndaǵy ahýaldyń jáne ekonomıkalyq konıýnktýranyń ózgerýine baılanysty jáne kóbine jaǵymsyz mánnen jaǵymdy mánge jáne kerisinshe ózgerýi múmkin» ekendigin atap ótti.
D. Ǵalıeva zeınetaqy aktıvterin jeke basqarýshy kompanııalardyń basqarýyna berý jónindegi usynystarǵa da toqtaldy.
"Salymshyǵa ınvestısııalyq strategııany jáne jeke basqarýshy kompanııany tańdaý quqyǵynyń beriledi. Bul, bizdiń pikirimizshe, zeınetaqy qyzmetteriniń básekeles naryǵyn damytýǵa túrtki bolady. Mysaly, básekeles ortadaǵy jumys basqarýshy kompanııalardy kóbirek ınvestısııalyq kiris alýǵa, salymshylarǵa qyzmet kórsetý sapasyn arttyrýǵa, ınvestısııalardy naryqtyq talaptarmen júzege asyrýǵa yntalandyratyny anyq. Bul usynystardy iske asyrý Qazaqstan Respýblıkasynyń zańnamasyna tıisti ózgerister men tolyqtyrýlar engizýdi talap etedi. Zeınetaqy jınaqtaryn basqarý júıesin bolashaqta reformalaý tujyrymdamasy búgingi kúni Qazaqstan Respýblıkasynyń Úkimetimen talqylanýda»», – dep naqtylady D. Ǵalıeva.
Qazaqstan Respýblıkasy Ulttyq bank tóraǵasynyń orynbasary memlekettiń zeınetaqy tólemderin alýshylarǵa BJZQ-ǵa naqty engizgen mindetti zeınetaqy jarnalarynyń zeınetkerlikke shyqqan sáttegi ınflıasııa deńgeıi eskerile otyryp saqtalatynyna kepildik beretinin eske saldy.
«Álemniń eshbir basqa elinde mundaı kepildik joq. Ádette, zeınetaqy júıelerindegi kepildikter júıesin qatysýshylardyń ózderi – zeınetaqy qorlary nemese basqarýshy kompanııalar qamtamasyz etedi, olar ınvestısııalyq kiristiń belgilengen «benchmarkke» qatysty belgili bir eń tómengi mólsherlemesine kepildik beredi. Kóp jaǵdaıda memlekettik baǵaly qaǵazdar boıynsha kiristilik nemese eldiń zeınetaqy júıesi boıynsha belgili bir kezeńdegi ortasha alynǵan kiris osyndaı «benchmark» bolady», – dep qorytyndylady D. Ǵalıeva.