QR Premer-Mınıstri Baqytjan Saǵyntaev Shyǵys Qazaqstan oblysyna jumys sapary barysynda kásipkerlermen kezdesý ótkizdi. Kezdesý barysynda memlekettik satyp alýlar júıesin odan ári damytýdyń ózekti máselelerin talqylandy, dep jazady pm.kz.
Baqytjan Saǵyntaev memlekettik satyp alýlar júıesin jetildirý jolynda birqatar jumystardyń atqarylǵanyn, soǵan oraı Qazaqstannyń úsh oblysynda memlekettik satyp alýlar kezinde qazynashylyq súıemeldeýdiń pılottyq jobasy engiziletinin habarlady. Bul qurylys sapasyn arttyrýǵa jáne iske asyrylatyn jobalarǵa otandyq kásiporyndardyń qatysý úlesin ulǵaıtýǵa múmkindik beredi.
Budan ózge, qazirgi ýaqytta ortalyqtandyrylǵan qyzmet qaǵıdasy boıynsha memlekettik satyp alýlardy júzege asyrý máseleleri pysyqtalýda.
Sondaı-aq, QR Premer-Mınıstri B. Saǵyntaev kásipkerlerge satyp alýlardyń IT-platformasy qurylatynyn aıtty. Ol bızneske óz óndirisin tıimdi josparlap, uıymdastyrýǵa múmkindik beredi jáne memlekettik jáne kvazımemlekettik sektorlardyń ortaq satyp alýlaryna qoljetimdilikti qamtamasyz etedi.
Keńes barysynda Shyǵys Qazaqstan oblysy ákiminiń birinshi orynbasary N. Saqtaǵanov jáne bıznes-qaýymdastyqtardyń ókilderi sóz sóıledi, sonyń ishinde «Atameken» Ulttyq kásipkerler palatasynyń basqarma tóraǵasy A. Myrzahmetov, ShQO Kásipkerler palatasynyń dırektory I. Shaskıı, «Almaty jeldetkishter zaýyty» JShS Dırektorlar keńesiniń tóraǵasy M. Baqqulov, Jıhaz jáne aǵash óńdeý ónerkásibi kásiporyndary Qaýymdastyǵynyń prezıdenti E. Sadyqov jáne «ESKO» JShS dırektory A. Shmarın bar.
Kezdesý qatysýshylary ónerkásiptiń túrli salalarynda memlekettik satyp alýlar júıesin damytý jónindegi óz usynystaryn aıtty.
Jalpy, Baqytjan Saǵyntaev QR Úkimeti júıelik negizde kásipkerlik ahýaldy jetildirý men bıznestiń iskerlik belsendiligin yntalandyrý boıynsha jumystar júrgizip jatqanyn atap ótti. Osy oraıda elimizdiń árbir kásiporny boıynsha jergilikti qamtý kólemin ulǵaıtý jumystary jalǵastyrylady. Budan ózge, kásipkerlerge qarjylyq jáne zańnamalyq qoldaý kórsetý sharalary usynylatyn bolady. QR Úkimeti bıznes shyǵyndaryn qysqartý men qaıta retteý jumystaryn jalǵastyrady.