Alaıaqtyq azaımaı tur

Jeńildiń astymen, aýyrdyń ústimen júrip, árkimdi aldap paıda tabýshylardyń sany azaımaı tur. Bireýdiń múlkin zańsyz ıemdenip, alaıaqtyqpen aqsha taýyp, kózboıaýshylyqpen kekire toıyp júrgenderdiń jolyn kesý maqsatynda Qyzylorda oblystyq ishki ister departamenti naqty sharalardy qolǵa aldy. Az kúndik jumystyń nátıjesinde alaıaqtyq qylmyspen aınalysqan eki adam quryqtalǵan. Osy naýryz aıynyń basynda polısııaǵa qala turǵyny shaǵymdanady. Jábirlenýshi óziniń tanysy joǵary jalaqysy bar jumysqa ornalastyramyn dep 150 000 teńgesin alyp, sol boıy izim-qaıym joǵalǵanyn aıtady. Osy iske qatysy bar degen kúdikpen polıseıler 30 jastaǵy azamatty qolǵa túsirdi. Búginde oǵan qatysty Qylmystyq kodeksiniń 190-baby 1-bóligi boıynsha is qozǵaldy. Sonymen qatar, sońǵy ýaqyt­tarda qundyz tondardy satý, satyp alýǵa qatysty alaıaqtyq faktileri de kóbeıýde. Máselen, aqpan aıynyń sońynda áldebir azamatsha 50 jastaǵy qala tur­ǵy­nynyń qundyz tonyn satyp alýǵa kelisip, otbasymen aqyldasý úshin tondy úıine alyp ketedi. Alaıda, jábirlenýshiniń senimin teris paıdalanyp, 250 000 teńge turatyn qundyz tonyn da, aqshasyn da qaıtarmaıdy. Naýryz aıynda jábirlenýshi ishki ister basqarmasyna aryz­danady. Sol kúni sezikti azamat­shanyń ústinen taǵy 2 aryz kelip túsedi. Barlyq qylmys bir júıemen jasalǵany, ıaǵnı eki jábirlenýshiniń de qundyz tondaryn satyp alatynyna sendirip, bótenniń menshigin zańsyz ıemde­nip ketkendigi anyqtalady. Birine 200 000 teńge, endi birine 250 000 teńge materıaldyq shyǵyn keltirilgen. 3 fakt boıynsha qylmystyq is qozǵalyp, kúdikti ishki ister basqarmasyna jetki­zildi. Qazirgi tańda sotqa deıingi tergep-tekserý jumys­tary júrgizilýde. Aıta keterlik jaıt, osy jyl­dyń 2 aıynda oblys kóleminde 168 alaıaqtyq qylmys tirkelgenimen, ol ótken jyldyń esepti merzimimen salys­tyrǵanda 20,4 paıyzǵa azaıǵan. Endi tirkelgen alaıaqtyq qyl­mys­tardy az-kem taldasaq. Qa­ryzǵa aqsha nemese zat alyp qaıtar­maǵandar – 34, nesıe alýǵa kómektesemin degender – 127, kezeksiz jer alyp beremin de­gender – 131, kezekten tys úı alýǵa kó­mek­tesemin degender – 124, ınternet jelisi nemese uıaly telefon arqyly senimge kirip, esepshotyna aqsha saldyrǵandar sany 71 qylmysty qurap otyr. Erjan BAITILES, «Egemen Qazaqstan»