«Egemen Qazaqstan» gazetiniń 3 qarashadaǵy sanynda «Soltústik sosıalızmmen nege qoshtaspaıdy?» atty maqala jaryq kórip, óńirdiń otarshyldyq Reseıdi, keńestik zamannyń totalıtarlyq belgilerin eske túsiretin ataýlardan áli arylmaı otyrǵany synǵa alynǵan bolatyn.
Gazettiń usynystaryn jergilikti bılik eskergen bolý kerek, jýyrda Petropavl qalalyq máslıhatynyń turaqty komıssııasy qoǵamdyq tyńdalym ótkizip, birqatar kóshelerdiń atyn aýystyrý, jańa esimder berý máselesin talqylady.
Solnechnyı shaǵyn aýdanynda boı kótergen kóshelerge Ǵalym Maldybaev, Eslám Zikibaev sııaqty belgili aqyn jerlesterimizdiń esimderin berý jónindegi usynys biraýyzdan qoldaý tapty. Qaýipti qylmyskerdi ustaý kezinde erlikpen qaza tapqan polısııa maıory Alekseı Sherbakovtyń da esimi umytylmaıtyn boldy.
– Jarııa tyńdaýǵa deıin kóshe ataýlarynyń tarıhy jan-jaqty zerttelip, turǵyndardyń oı-pikirleri jete eskerildi. Aldaǵy ýaqytta da Táýelsizdigimizben úsh qaınasy sorpasy qosylmaıtyn jer-sý ataýlary ózgertiletin bolady. Sakko jáne Vansettı, Klara Setkın, Volodarskıı, Haltýrınniń óńirimizge qandaı qatysy bar? – dedi jaıshylyqta búırekten sıraq shyǵarýǵa beıim qalalyq máslıhattyń depýtaty Pavel Afanasev bul joly erekshe belsendilik tanytyp.
О́ńirimizge múldem qatysy joq, bolmasa eshqandaı mán-maǵynaǵa ıe emes ataýlardan kóz súrinetini ras. Máselen, oblys ortalyǵynda bir Sennaıa ataýynda – 6, Kırpıchnaıa dep atalatyn 4 kóshe bar. Jıynda Besinshi Sennaıa kóshesin ataqty sportshy Qazbek Baıbolovtyń, Iаvlenka tasjolyna Qojabergen jyraýdyń esimin berý týraly sheshim esh qarsylyqsyz qabyldandy. Tyńdalymǵa qatysýshylardyń biri Jadyra Qaraǵojına Alash kósemi Álıhan Bókeıhanovty da ulyqtaý máselesin qozǵady.
Árıne, kóshe ataýlaryn bir mezette qalypqa keltirý múmkin emes. Desek te, ataýlardy jańartý qajettigin halyq qalaýlylary túsingen syńaıly.
О́mir ESQALI,
«Egemen Qazaqstan»
Soltústik Qazaqstan oblysy