Qazaq kınosynyń maqtanyshy, aıryqsha daryn ıeleriniń biri ári biregeıi, akter, rejısser, KSRO halyq ártisi Asanáli Áshimov ónerimen mıllıondarǵa tanymal bolyp, kózi tirisinde «ańyz adam» atanǵan tulǵa.
Aýyl sharýashylyǵynyń bir kásibiniń tutqasyn ustaý úshin Almatyǵa oqýǵa kelgen jas jigittiń alǵashqyda joly bolmady. Keler jyly taǵy da Aýyl sharýashylyǵy ınstıtýtyna túskisi kelgende ómiri basqa arnaǵa burylatynyn ol bilgen joq. Almaty memlekettik konservatorııasynyń janynan akterlyq bólim ashylady, onda kıno men teatr akterlaryn daıyndaıdy degen habarlandyrýdy gazetten oqıdy. Akterlyq mamandyq degenniń bar ekenin bilmeıtin jigit rejısser Asqar Toqpanovtyń shaqyrýymen konservatorııaǵa keledi. О́zi qalamaǵan, arnaıy daıyndyǵy da joq Asanáli Áshimuly akter bólimine kandıdattyqqa túsip, bir jyl stıpendııasyz, jataqhanasyz oqıdy. Keler jyly ǵana negizgi bólimge qabyldandy. Ol stýdenttik jyldarda 4 kınoǵa túsedi. Sóıtip júrip, keshigip, oqýdan shyǵyp qalǵan kezderi de boldy. Bundaı sátsiz jáıtterge ol moıymady, ómir ony shyńdaı berdi.
О́mir jolynda ol óziniń naǵyz maıtalman akter ekenin dáleldedi. Kásibıligin jetildirip, mamandyǵyn tolyq ıgerýge bar kúsh-qaıratyn jumsady. Shyn talant bolmasa, bireýdi akter etip daıyndaý degendi A.Áshimuly qısynsyz dep túsinedi. Patrıottyqtyń negizi – namys, daryndy adamnyń da basty qasıeti osy namysqoılyǵynda deı otyryp, osyndaı akter ǵana qazaq kınosy men teatr óneriniń shańyraǵyn bıiktete alady, biraq bul qasıet ekiniń birinde kezdespeıdi degen oı túıedi.
Rejısser S.Qojyqovtyń «Qyz Jibek» fılmimen tanymaldyq alyp, tabysty joly bastalǵan soń sapaly, jaqsy kınoǵa ǵana tústi. Kınomen qatar eńbek joly qazaq teatrymen tyǵyz baılanysta boldy. Ol 50 jyl teatr sahnasynda qazaq, orys, shetel dramatýrgteriniń spektaklderinde oınady.
«Jetesi bar adamǵa akterlyq mamandyq – úlken danalyq kásip», - dep túsindiretin qazynaly aqsaqal kishi uly Saǵı akterlyqty tańdaǵanda “balam, nege menimen aqyldaspaı oqýǵa tústiń, kınonyń qandaı aýyr jol ekenin túsinemisiń? Endi ómir boıy halyq aldynda emtıhandar tapsyryp ótesiń», - degen edi. Ol stýdentterin «20-30 jyl boıy oınap júrgen rolińdi tolyq ıgerdim dep oılama, ony búgingi zaman kórermenine laıyqtap jetkizýdi oılan. Akterdyń mindeti - avtordyń sózin tolyqtyryp aıtý, aıtar sózdiń astaryn ashý, fılosofııasyn ashý», dep tárbıeleýde.
A.Áshimuly tabysty otbasyn baqytymen baılanystyrady. «О́z otbasyna qadirsiz, súıkimi joq adam, qoǵamnan da ornyn taba almaıdy», deıdi. Toqsanynshy jyldardaǵy Asanáli Áshimov ómirindegi tragedııa halyqqa belgili. Ol bas aıaǵy on jyl ishinde búkil otbasynan aıryldy. Aldymen ómirlik jary, sonan soń Mádı men jas daryn Saǵı, keıin anasy ómirden ozdy. Osy bir qara boıaýy kóp kezeńde teatr men kınoda da biraz úzilister boldy. Bar nárseniń sońynyń qaıyryn surap, sabyr etken qulyna bir Jaratýshy pana boldy. Iá, aǵanyń moıymaı, «ómirdiń qıynshylyǵy men qyzyǵyn kórdik, sahnanyń qıynshyly men rahatyn kórdik. О́mirge, taǵdyryma ókpem joq» dep qaıtadan aıaqqa turyp, optımızmmen jańa ómir qurýy da pende ataýlynyń barshasyna úlgi.
...2002 jyly A.Áshimovke arnalyp G.Gaýptmannyń «Ymyrttaǵy mahabbat» dramasy qoıyldy. Munda ol qart nemis Mattıas Klaýzenniń rolinde oınady. О́z sózimen aıtar bolsaq, osy keıipker men akterdiń ómirinde tylsym baılanys, uqsastyq bar eken... Bul spektaklden bastap akterdiń shyǵarmashylyq ómiri jańa deńgeıde qaıta bastaldy.
Halqy ardaq tutqan A.Áshimov qazirgi ýaqytta óskeleń áriptesterine, shákirtterine jazylǵan erejelerden tys, óziniń kamera aldynan jınaǵan tájirıbesin úıretýdi boryshy sanaıdy. Ol sheberlik saǵattaryn berip, óz stýdııasynda áli de túsirilimderde oınap, ustazdyq qyzmetpen shuǵyldanyp, halyqaralyq konkýrstarda tórelik aıtyp, shyǵarmashylyǵynyń kemeldengen tusynda. Keler jyly 80 jas mereıtoıyn toılaǵaly otyrǵan Asanáli aǵanyń tabysqa bastaǵan qaıtalanbas óner joly bar. Onyń boıyndaǵy qajymas qaırat pen bıik rýh áli de shyǵarmashylyq jolynda kórermenderin tańqaldyratyn jańa túsirilimderdi syılaıdy dep kútemiz.
Bul maqala ómiri men óneri ónegeli, tabysty tulǵalardyń ónerin nasıhattaý maqsatynda «Tabystyń 100 qadamy» ulttyq jobasy boıynsha jazyldy.
Baqyt Joldybaıqyzy