Búgingi ulttyq «Tabysty 100 otbasy» jobasynyń keıipkeri - Memlekettik syılyqtyń ıegeri, jazýshy Ákim Tarazı. Ol ádebıette óziniń qaıtalanbas sara jolyn salǵan bıik tulǵanyń biri. Ákim aǵanyń eńbek joly 1955-1956 jyldary aýyl mektebinde muǵalim bolýdan bastaldy. Osy kezde onyń tyrnaqaldy «Quıryqty juldyz» povesi jaryq kórip, keıin áńgimeleri men povesteri, romandary oqyrmandarymen qaýyshyp jatty.
«Eshkimge sanaly túrde zulymdyq pen qııanat jasaǵam joq. О́zimdi eshkimnen bıik sanamadym», - deıdi Ákim Urtaıuly suhbatynda. Jazýshy qalamynan týǵan birqatar «Kúlmeıtin komedııa», «Jaqsy kisi», «Álııa», «Joly bolǵysh jigit», «Qos bozdaq» sııaqty pesalary qazaq drama teatrynyń sahnasynda qoıyldy. Daryndy dramatýrg týraly Memleket qaıratkeri M.Joldasbekov telearnadan bergen suhbatynda: «Ákim qazaqtyń mańdaıyna bitken jazýshylardyń birine aınaldy. Ol qoǵamdaǵy qaıshylyqtarǵa jany aýyratyn, ádiletsizdikke tózbeıtin adamdar beınesin jasady» degen pikirin bildirgen edi.
Ákim Urtaıulynyń eńbek jolynyń bir qyry qazaq kıno ónerimen tyǵyz baılanysta boldy. Ol 1962–1970 jyldary «Qazaqfılm» kınostýdııasynda qyzmet etip, kelesi on jylda Qazaqstan Kınematografıster odaǵy basqarmasynyń birinshi hatshysy laýazymynda jemisti shyǵarmashylyqpen aınalysty. Bul kezeńde Ákim aǵanyń jazǵan ssenarıılerine kınolar túsirilip jatty. Ol – sovet rejısseri Shárip Beısenbaev túsirgen «Arman-ataman» (1965), KSRO halyq artısi, rejısser Bolotbek Shámshıev túsirgen qazaq kınosynyń jaýharynyń biri «Qarash-qarash oqıǵasy» (1972), rejısser Májıt Begalın túsirgen «Tulpardyń izi» (1984), S.Narymbetov túsirgen «Mustafa Shoqaı» fılmderi. Keıipker arqyly qoǵamdaǵy úlken oqıǵalardy kórsetip, ózekti taqyryptardy kótergen bul týyndylar uzaq jyldar izdenisi men damylsyz oqý, oı eńbeginiń jemisi.
Á.Tarazıdyń ustazdyq ustanymyna toqtalar bolsaq, ol ómirlik mol tájirıbesi men jınaǵan bilimin stýdentterine úıretýden jalyqqan emes. «Daýys kóterip bala tárbıelemeımin» degen jazýshy «men ustaz ǵana emes, áke-sheshelerińmin, qandaı qıynshylyq bolmasyn, jasyrmaı aıtyńdar» dep shákirtterimen qurdasyndaı sóılesse de, oqýǵa kelgende úlken jaýapkershilik pen daıyndyqty talap etedi. Jastarmen kezdesýinde Ákim aǵa: «Jazýshylyq taǵdyrdan bolady. Jazýshy qurmet, marapat izdemeı, janynyń mereıin izdeý kerek. ...Jandaryń taza bolsyn, Allah berekeli baqytty jany taza adamǵa beredi» degen edi.
Ádebıet áleminde de, óner men bilim berý salalarynda da Ákim Tarazıdiń berik ustanymy, eshkim qaıtalaı almaıtyn dara joly bar. Qadirli aqsaqal óskeleń urpaqtyń keleshegine senedi, qazaq eliniń erteńine senedi.
Baqyt Joldybaıqyzy