Jyl basynan beri Enbek.kz elektrondyq eńbek bırjasynda jumys berýshiler 102,7 myń bos jumys ornyn jarııalasa, jumys izdegender 162,4 myń túıindeme ornalastyrǵan. Jumys izdeýshiler sany bos oryndar sanynan asyp tústi, bir jumys ornyna orta eseppen 1,58 túıindemeden kelgen. Bul rette barlyq jumys usynystarynyń 80%-dan astamy bilikti kadrlarǵa baǵyttalǵanyn aıta ketken jón.
Elektrondyq eńbek bırjasyndaǵy ózgeristerge qarap, suranys pen usynystyń qys aılarynda qubylýy qalypty jaǵdaı dep paıymdaýǵa bolady. Birer aıda jumysshy mamandyqtar suranystyń jartysyna jýyǵyn qurap, 48,9 myń (47,6%) bos jumys orny jarııalanǵan. Naqty kásipterdiń ishinde jumys berýshiler tarapynan eń kóp suranysqa ıe bolǵan meıirger (1,9 myń bos jumys orny), sanıtarlar men avtomobıl júrgizýshileri (árqaısysy 1,8 myńnan), matematıka pániniń muǵalimderi (1,7 myń) eken.
Salalyq bóliniste suranys barlyq bos oryndardyń 66,4%-yn quraıtyn bes negizgi salada shoǵyrlanǵan. Ádettegideı, 33 myńnan astam habarlandyrý jarııalanǵan bilim salasy kósh bastap tur. Bul degenińiz – jalpy sannyń úshten birge jýyǵy osy salaǵa tıesili degen sóz. Odan keıin ózge de qyzmet túrlerinde – 11,4 myń (11,1%), densaýlyq saqtaý men áleýmettik qyzmet kórsetý salasynda 9,7 myń (9,5%) bos oryn ornalasqan. Sol sekildi kadrlarǵa joǵary qajettilik memlekettik basqarýda (7 myń), óńdeý ónerkásibinde (6,9 myń) tirkelgen.
О́ńirlik bóliniste bos oryndardyń eń kóp sany Astana qalasynda (8,9 myń), Túrkistan (7,3 myń), Qaraǵandy (7,1 myń) oblystarynda, sondaı-aq Almaty qalasynda (6,9 myń) tirkelipti. Jumys izdep, túıindeme jarııalaǵandardyń qatarynda Túrkistan oblysynyń (23 myń) turǵyndary kósh bastaǵan. Sondaı-aq Atyraý (12,2 myń), Mańǵystaý (11,3 myń), Qyzylorda (10,9 myń) oblystarynyń turǵyndary joǵary belsendilik tanytqan. Megapolısterde de osyǵan uqsas kórsetkishter baıqalǵan.
Jyl basynda jumys berýshiler eń joǵary jalaqyny burǵylaý jónindegi sýpervaızerlerge (orta eseppen 991 myń teńgeden bastap), óndirýshi ónerkásiptegi ýchaske bastyqtaryna (876 myń teńgeden bastap), bas geologterge (803 myń teńgeden bastap) usynypty. Jumys izdeýshiler tarapynan jalaqy boıynsha eń joǵary úles jańa ónimderdi ázirleý jónindegi joba jetekshileriniń (1,3 mln teńge), jeke sektordaǵy kommersııalyq dırektorlardyń (1,2 mln teńge), iske qosý men synaqtar jónindegi ınjenerlerdiń (orta eseppen 865 myń teńge) túıindemelerinde baıqalǵan.