Qaratal aýdanyndaǵy «Tastóbe AgroFýd» JShS kesheni - Táýelsizdiktiń 25 jyldyǵyna arnap ashylǵan mańyzdy nysandardyń biri. Saltanatty ashylý rásimine kásipker, Olımpıada chempıony Jaqsylyq Úshkempirov, oblys ákiminiń orynbasary Serikjan Beskempirov, aýdan ákimi Qaırat Bısembaev arnaıy qatysty. Bul týraly oblys ákimdiginiń baspasóz qyzmeti habarlady.
Nysan ıesi Sábıt Ahmetovtiń aıtýynsha, 2015 jyly 90 bas iri qara ákelse, bıylǵy jyly taǵy 120 bas satyp alǵan. Endi mal basyn 1 500-ge jetkizýdi josparlap otyr. Iri qaranyń barlyǵy da sımmental tuqymy. Kásipkerdiń sózine súıensek, búgingi kúni shveısarııalyq sıyrlar táýligine 1,5 tonnaǵa deıin sút beredi. Josparda ony 8 tonnaǵa deıin jetkizý kózdelgen.
Saýylǵan sút túgelimen sút ónimderin shyǵaratyn «Úshtóbe Aıdyn» JShS-ǵa jiberiledi. Sonyń nátıjesinde sút óndirisiniń aýdandaǵy kóshbasshysy ónim túrin kóbeıtip, sapasyn arttyrýǵa múmkindik aldy.
- Sút keshenin ashý - aýdanymyz úshin aıtýly oqıǵa. Keshen maldyń joǵary ónimdiligimen, maldy baptaýǵa jasalǵan qolaıly jaǵdaıymen, jańa tehnologııany engizýimen erekshelenedi. Búgingi kúni fermada 50 adam jumys isteıdi. Sharýashylyq ıesi keıin irgesin keńeıtip, jumysshylar sanyn 100-ge jetkizýdi de josparlap otyr. О́tken jyly nysannyń qurylysy bastalǵannan beri bizdiń aýdandyq fılıal zańdyq turǵydaǵy máselelerge qatysty jan-jaqty kómek kórsetti, - dedi Kásipkerler palatasynyń Qaratal aýdandyq fılıalynyń dırektory Marat Qusaıynov.
Jalpy, jyl basynan beri Qarasaı aýdanynda 750 basqa arnalǵan joǵary ónimdilikti sút-taýarly ferma jáne «Medeý Kommers» JShS-nyń progressıvti tehnologııa negizinde qýattylyǵy jylyna 5 myń tonna bolatyn sút óńdeý sehy iske qosylǵan.