Mınıstr balalar úıine sońǵy úlgidegi medısınalyq fızıokabınetke arnalǵan «Bınom» medısınalyq qurylǵysyn syıǵa tartsa, óńir basshysy 20 tárbıelenýshige EKSPO -2017 kórmesiniń bıletterin tartý etti.
«Munda balalardyń eshteńege alań bolmaı ósýine, oqýyna, jalpy azamat bolyp qalyptasýlaryna barlyq jaǵdaı jasalynýy tıis. Sondyqtan mekeme qyzmetkerlerine úlken jaýapkershilik artylady»,- degen oblys ákimi Janseıit Qanseıituly balalardyń Astanaǵa baryp-qaıtý shyǵyndaryn da óz esebinen júzege asyratynyn jetkizdi.
Atalǵan mekeme jyl basynan beri QR Din isteri jáne azamattyq qoǵam mınıstrliginiń qamqorlyǵyna alynǵan bolatyn. Qazirgi tańda munda 3 jastan 11 jasqa deıingi 68 jetim jáne ata-anasynyń qamqorlyǵynsyz qalǵan balalar tárbıelenedi. Mekemede 45 qyzmetker jumys isteıdi. Onyń 21-i pedagog, onbesi tárbıeshi, tórteýi dáriger.
Aıta keteıik, 2016-2017 jyl aralyǵynda balalar úıiniń 9 tárbıelenýshisi qamqorshylyqqa, 3-tárbıelenýshisi patronattyq tárbıege berilip, 6 bala týǵan otbasyna qaıtarylǵan.
Tárbıelenýshilerdiń barlyǵy turǵyn úı alýǵa kezekke qoıylǵan. Jetim balalardyń járdem aqylary óz esep shottaryna túsip otyrady. 46 mektep jasyndaǵy bala, qaladaǵy №33 K. Qasymuly atyndaǵy jalpy orta mektepte bilim alady, 22 bala mektepke deıingi toptarda tárbıelenedi. Mektepke deıingi toptar «Zerek bala» baǵdarlamasy boıynsha dáris alady.
Balalar úıinde oqý-tárbıe jumysy tolyǵymen qazaq tilinde júrgiziledi, bı, vokal, qol óner úıirmesi jumys isteıdi. Úıirmege 58 bala qatysady. Sabaqtan tys ýaqytta túrli is-sharalar uıymdastyrylady. Balalar oqý quraldarmen tolyq qamtylǵan.