Jınalǵan kópshilik keshenniń konferensııa zalynda akamedık, iri ǵalym Álkeı Marǵulandy ardaqtaýmen birge Elbasymyz Nursultan Nazarbaevtyń «Bolashaqqa Baǵdar: Rýhanı Jańǵyrý» atty maqalasynda usynylǵan «Týǵan jer» baǵdarlamasyn talqylady.
Sharany uıymdastyrýshylar – Á.Marǵulan atyndaǵy №40 orta mekteptiń murajaı qyzmetkerleri. Soǵan baılanysty №40 orta mekteptiń dırektory Erbol Irgebaev pikirin bildirgen edi.
«Biz 4 jyl buryn Táýelsizdik saraıynda ǵulama ǵalymǵa arnalǵan respýblıkalyq kórme ótkizgen bolatynbyz. Búgin sol dástúr jalǵasyn taýyp Álkeı atamyzdyń urpaqqa qaldyrǵan amanatyn jańǵyrtý , Elbasymyzdyń «TÝǴAN JER» baǵdarlamasyn jastarǵa uǵyndyrý maqsatynda osy is-sharany uıymdastyryp otyrmyz. О́skeleń urpaq óz tarıhyn, danalaryn aıyryqsha bilýi kerek, sonda bizdiń Máńgilik El ataný muratymyz aıqyn, aıshyqty bolmaq» dedi, mektep basshysy.
Sirá, aqyn, qoǵam qaıratkeri Ǵumar Qarashtyń:
Áýeli qoldan kelse elińdi súı
Eli úshin eńbek etken erińdi súı
Qaǵbaǵa táýep etý kerek bolsa,
Kir jýyp kindik kesken jerińdi súı.
degen óleń joldary osyndaı dúnıelerge arnalsa kerek-ti.
Otyrysqa Erbol Islámulymen birge, professor Jambyl Omaruly, EUÝ Fılologııa fakýltetiniń oqytýshysy Jumaǵul Saǵynbaı, Á.Marǵulan atyndaǵy №40 mektep murajaıynyń meńgerýshisi Sáýle Jumabekqyzy jáne osy bilim uıasynyń oqýshylary qatysty. Is-shara sońynda ónerli órender án aıtyp, óleń oqyp óz ónerlerin ortaǵa saldy.
Eske sala ketsek, jýyrda «Atameken» qazaqstan kartasy» etno-memorıaldyq kesheni «EKSPO-2017» kórmesine oraı qaıta jańarýyna baılanysty ashylý saltanatyn ótkizbek.
Azamat Máýlenuly