Kolledjdiń alash ıdeıasy men alash qaıratkerleriniń murasyn nasıhattaýdaǵy is-tájirıbesin oblystaǵy ózge bilim ordalarymen bólisý maqsatynda qolǵa alynǵan semınar-praktıkýmnyń aıasynda birqatar taǵylymdy is-sharalar uıymdastyryldy. Qonaqtar «Alash» elektrondy kitaphanasynyń jumysymen tanysyp, «Alash arystary: sońǵy sóz, sońǵy sýret» atty fotogalereıany tamashalady. Álıhan Bókeıhanov, Ahmet Baıtursynov bastaǵan birneshe alash qaıratkeriniń atylar aldyndaǵy sońǵy sýretteri ilingen fotogalereıany kórgen belgili ádebıettanýshy ǵalym Arap Espenbetov tolqyp, tebirene sóıledi. «Semeıdegi alash qaıratkerlerine qatysy bar tarıhı ǵımarattar men eskertkishterdiń kópshiligin saqtaı almadyq. Abaıdyń alǵashqy mýzeıi turǵan ǵımarat joq. Muhtar Áýezov túsken ǵımarat joq. Qaladaǵy alashtyń alyptarynyń izi qalǵan, qoldarynyń taby qalǵan, Á.Marǵulan, Q.Sátbaev, J.Aımaýytov, T.Jomartbaev, B.Sársenov, Q.Nurmuhametov syndy tulǵalar bilim alǵan, qyzmet etken, buzylmaı saqtalǵan sanaýly ǵımarattyń biri – osy bilim ordasy. Pedagogıkalyq kolledjdiń jasap jatqan jumystary jastardyń tárbıesine zor kómegin tıgizedi. Alash arystary sońǵy sózin aıtyp, sońǵy sýretteri túsirilgeninshe qanshama azapty bastan keshirdi. Sondyqtan alashty taný, alash arystaryn ardaqtaý baǵytyndaǵy jumystar únemi, júıeli túrde júrgizilýi tıis», deıdi ǵalym. Bul kúni shahardaǵy Asan Omarov, Qusmilııa Nurqasym, Turdyqul Shańbaı, Muratbek Kenemoldın syndy zııaly qaýym ókilderi Astanadaǵy Eýrazııa ulttyq ýnıversıtetiniń qyzmetkeri, alashtanýshy Erlan Saılaýbaımen onlaın-rejimde pikir almasyp, alash taqyrybyndaǵy oılaryn ortaǵa saldy. Shara sońynda alash qaıratkerlerine arnap quran qatym túsirilip, as berildi.
Azamat QASYM,
«Egemen Qazaqstan»
Shyǵys Qazaqstan oblysy