Keshe Ázerbaıjannyń astanasynda bokstan eresekter arasynda álem chempıonaty bastaldy. Bul – Halyqaralyq áýesqoı boks qaýymdastyǵynyń aıasynda 1974 jyly alǵash ret ótkizilgen boksshylar básekesinen bergi 16-shy álem chempıonaty. Bıylǵy chempıonatqa álemniń 130 elinen 700-den astam bylǵary qolǵap sheberleri qatysýda. Olar 26 qyrkúıek pen 9 qazan aralyǵynda 10 salmaq dárejesinde London Olımpıadasynyń joldamasy úshin baq synasady.
Álem chempıonatyna bizdiń quramany 23 qyrkúıek kúni Qazaqstan Boks federasııasynyń vıse-prezıdenti, AIBA bıýrosynyń múshesi, dańqty boksshymyz Serik Qonaqbaev pen ulttyq quramanyń bas bapkeri Myrzaǵalı Aıtjanov bastap keldi. Bul básekede bizdiń el myna quramda qatysatyn bolady. Iаǵnı, eń jeńil 49 kılo salmaqta Birjan Jaqyp qatysady. Bizdiń elde osy salmaqta el namysyn qorǵaýǵa laıyq birneshe boksshynyń bar ekenin bilemiz. Degenmen, bas bapker Birjan Jaqypty ulttyq quramada óner kórsetýge laıyq dep sheshti. Bul jerde Aıtjanov óziniń tól shákirtiniń sońǵy kezderdegi ónerin eskergen bolý kerek. Ol bıyl úlken jarystarǵa qatyspaǵanymen, elishilik syndarda, irikteý kezindegi sparrıngterde ózin jaqsy jaǵynan kórsete bildi.
Kelesi, 52 kılo salmaqta jarysqa tarazdyq boksshy Oljas Sáttibaı qatysady. Bul salmaqta da elimizde álemdik básekege qatysýǵa laıyq boksshylar jetkilikti. Biraq, bas bapker solardyń ishinde irikteý kezinde ózin jeńiske degen jigerliligimen tanytyp, kózge túsken Oljas Sáttibaıdy qurama sapyna aldy. Odan keıin 60 kıloda elimizdiń 2009 jáne 2010 jylǵy chempıony Ǵanı Jaılaýov qolǵap túıistiredi.
64 kg. salmaqta ulttyq qurmaǵa byltyrǵy Azııa oıyndarynyń jeńimpazy, 2010 jáne 2011 jyldarǵy el chempıony Danııar Eleýsinov qosylyp otyr. Qazir osy boksshyǵa kóp adamdar senim artýda. Bıylǵy jarysta namysqa tyrysyp, ózin taǵy bir dáleldese, Danııardyń álem chempıony atanýy ábden múmkin.
Kelesi, 69 kıloda sharshy alańǵa elimizdiń úzdik boksshylarynyń biri Serik Sápıev shyǵady. Bul – Sápıev úshin tórtinshi álem chempıonaty. Munyń aldynda ol eki ret álem chempıony atanyp, osydan eki jyl buryn Mılanda ótken synda qola júldege ıe bolǵan edi. Endi eki dúrkin álem chempıony úshinshi márte bas júldeni jeńip alýdy maqsat etip otyr.
75 kıloda Danabek Sýjanov sharshy alańǵa shyǵady. Ol da sońǵy kezderi bapkerlerdiń kózine túsip júrgen boksshy. Byltyr ol Gýanchjoýda ótken Azııa oıyndarynda qola júldege ıe boldy. 81 kg. salmaqta jarysqa Ádilbek Nııazymbetov qatysady. Bul salmaqta da ulttyq quramanyń múshesi bolýǵa laıyq birneshe boksshy bar bolatyn. Solardyń ishinen eń sońǵy sátte bas bapker Nııazymbetovke tańdaý jasaǵan eken. Kelesi, 91 kg. jáne asa aýyr salmaqta Vasılıı Levıt pen Ivan Dychko qolǵap túıistiredi. Osy boksshylardyń bárin álem chempıonatyna ózderiniń jeke bapkerlerimen birge Nurlan Aqúrpekov, Aleksandr Strelnıkov pen Marat Eleýsinov bastap ákelip otyr. Sońǵysy Danııar Eleýsinovtiń ákesi men bapkeri.
Osy chempıonatta elimiz bir altyn, bir kúmis jáne bir qola júldeni jeńip alýdy maqsat etip otyr. Bul – ulttyq quramanyń bas bapkeri Myrzaǵalı Aıtjanovtyń sózi.
* * *
Keshe tús aýa bizdiń quramada eń jeńil salmaqta birinshi bolyp Birjan Jaqyp kýbalyq Iosvanı Veıtııamen qolǵap túıistirdi. О́kinishke qaraı, jeńis bizdiń jaqta bolmady. Kýbalyq 19 jasar boksshy úsh raýndtyń bárinde basymdyq tanytyp, jeńiske jetti. Esep – 21:11.
Baký sharshy alańynda Birjan Jaqyp qolǵap túıistirip jatqanda, kórshi rıngte qytaı Zoý Shımın domınıkandyq Hýan Medınamen kezdesip, qarsylasyn taza utty.
Búgin óz salmaǵynda Oljas Sáttibaı marokkolyq Abdelfattah Nafılmen kezdesedi.
Dastan KENJALIN, «Egemen Qazaqstan»– Bakýden.