«Byltyr kúzde oblys ákimi Danıal Ahmetov aýdanǵa arnaıy kelip, Alakólge baılanysty jıyn ótkizgen bolatyn. Sol jıynda kólge abattandyrý jumystaryn durys júrgizbeıtin, sanıtarlyq talaptardy durys saqtamaıtyn kásipkerlerdiń demalys bazasyn iske qosýǵa 2017 jyly ruqsat berilmeıtinin aıtqan-dy. Qazirgi ýaqytta mundaǵy 147 demalys bazasynyń 43-i týrısterdi qabyldaýǵa daıyn. Qalǵandary 1 shildege deıin aıaqtaımyz dep ýáde berip otyr. Eger osy merzimge deıin aıaqtamaıtyn bolsa, olardyń demalys oryndary ashylmaıtyn bolady», dedi Úrjar aýdany ákimi Serik Zaınýldın. Alakóldi abattandyrý úshin oblystyq bıýdjetten 500 mıllıon teńge bólingeni belgili. Aýdan basshysynyń aıtýynsha, bul qarjynyń 150 mıllıonyna úlken saıabaq salynyp jatyr. Qurylysy 20 maýsymǵa deıin aıaqtalady. Sonymen qatar, Alakólde zamanaýı talaptarǵa sáıkes keletin dúńgirshekter men úlken jaǵajaıdyń qurylysy qyzý júrgizilip jatyr. Jaǵalaýǵa seksen úsh beınekamera ornatylady, tórt polısııa, eki medısınalyq beket boı kóteredi. Otyzǵa jýyq polıseı táýlik boıy qyzmet kórsetedi. Jeti shaqyrymnan astam jol asfalttalyp, eki shaqyrymnan astam jaıaý júrginshiler joly salynady. Taǵy bir jaǵymdy jańalyq, munda avtobeket pen avtoturaq iske qosylady. Serik Zaınýldın aýdan turǵyndary Alakóldiń jaǵasyna 760 metr aýmaqqa óz erikterimen gúl jáne aǵash kóshetterin otyrǵyzǵanyn aıtyp, bul jerdegi jumystardyń 1 shildege deıin tolyq aıaqtalatynyn jetkizdi. Al sýǵa túsý maýsymy 20 maýsymǵa qaraı bastalady.
Azamat QASYM, «Egemen Qazaqstan»
Shyǵys Qazaqstan oblysy