1804 shary metr aýmaqty alyp jatqan eki qabatty pavılonnyń birinshi qabatyndaǵy mýltımedııalyq tehnologııalar arqyly Ońtústik Koreıanyń osy saladaǵy jetistikterimen tanysýǵa bolady. Budan bólek, avtorlar Aslan esimdi qazaq balasy týraly hıkaıany daıyndap qoıǵan. Ol Tedjon degen aralǵa attanyp, qýrap bara jatqan aǵashtardy qutqarady. Sodan keıin Ara esimdi qyzdyń kómegimen energııanyń jańa kózin tabady.
Pavılonnyń ekinshi qabatynda osy eldiń mádenıetimen tanysýǵa múmkindik bar. Onda koreı xalqynyń ulttyq taǵamdarynan dám tatyp, kádesyılaryn satyp alýǵa bolady. Sondaı-aq, Ońtústik Koreıa serıaldarynyń promo-kórsetilimi uıymdastyrylady.
Aıta keterligi, Koreıa Respýblıkasy EKSPO kórmelerine 1970 jyldan beri qatysyp keledi eken. Bul memlekettiń Tedjon men Iosý qalalarynda da atalǵan kórme uıymdastyrylǵan.
Ashat RAIQUL, «Egemen Qazaqstan»