Kezdesýge Qazaqstan Respýblıkasynyń Qorǵanys mınıstri – S.Jasuzaqov, Qytaı Halyq Respýblıkasynyń Qorǵanys mınıstri – Chan Vansıýan, Reseı Federasııasynyń Qorǵanys mınıstri – S.Shoıgý, Tájikstan Respýblıkasynyń Qorǵanys mınıstri – M.Sheralı, О́zbekstan Respýblıkasynyń Qorǵanys mınıstri – K.Berdıev, Qyrǵyz Respýblıkasy Bas shtabynyń bastyǵy – R.Dýıshenbıev, Shanhaı yntymaqtastyq uıymynyń Bas hatshysy R.Alımov qatysty.
Memleket basshysy Shanhaı yntymaqtastyq uıymyna múshe memleketterdiń qorǵanys mınıstrleri Astanada ShYU-ǵa múshe-memleketter basshylarynyń keńesin jáne «EKSPO-2017» halyqaralyq kórmesin ótkizý qarsańynda basqosyp otyrǵanynyń mańyzdylyǵyn atap ótti.
– Mádenı, aýmaqtyq, tarıhı turǵydan bir-birine jaqyn memleketterdiń ekonomıkalyq yntymaqtastyq máselelerin sheshý úshin qurylǵan Shanhaı yntymaqtastyq uıymy ózin aıtýly óńirlik birlestik retinde kórsete bildi, – dedi Qazaqstan Prezıdenti.
Nursultan Nazarbaev Shanhaı hartııasy qabyldanǵan sátten beri 15 jyl ótkenine jáne osy ýaqyt aralyǵynda birlesken aýqymdy jumys atqarylǵanyna nazar aýdardy.
– Shanhaı yntamaqtastyq uıymyna múshe memleketter basshylary keńesiniń aldaǵy otyrysynda iri eki el – Úndistan men Pákistandy uıym músheligine qabyldaý kózdelgen. Sol arqyly ShYU jer shary turǵyndarynyń 40% -ǵa jýyǵyn biriktiredi. Eń bastysy – barlyq máselelerdi konsensýs arqyly sheshýge negizdelgen «shanhaı rýhyn» saqtaý, – dedi Memleket basshysy.
Qazaqstan Prezıdenti uıym qyzmetiniń ekonomıkalyq mazmunyn nyǵaıtý qajettigin atap ótti.
– Shanhaı yntymaqtastyq uıymynyń oń dınamıkasy qazirgi ýaqytta «Jańa Jibek joly» baǵdarlamasynyń damýymen baılanysty bolyp otyr. Bul baǵdarlamaǵa uıym músheleriniń barlyǵy, eń aldymen, Qytaı Halyq Respýblıkasyna jaqyn kórshi bolyp tabylatyn Qazaqstan qoldaý kórsetýde, – dedi Nursultan Nazarbaev.
Sońynda Memleket basshysy qorǵanys vedomstvolarynyń qyzmeti Shanhaı yntymaqtastyq uıymynyń ekonomıkalyq ıntegrasııasynyń baǵytymen qatar júrýge tıis ekendigin atap ótti.