Banktiń qazirgi bıznes úlgisi tehnologııalyq qyzmetterdi damytý arqyly paıyzsyz tabys kólemin arttyrýǵa, sondaı-aq, joǵary marjınaldylyqty saqtaı otyryp, tólem kartalar naryǵyndaǵy qyzmetin keńeıtýge baǵyttalǵan.
«Astana banki» AQ-nyń qarapaıym aksııalary maýsymnyń sońynda saýdalana bastaıdy, tıkeri – ABBN. IPO-nyń ındıkatıvtik baǵasy – bir aksııa úshin 1 150 teńge. IPO-ǵa ornalastyrylatyn aksııalardyń sany – 2,1 mln. dana, ornalastyrylym kólemi – 2,5 mlrd. teńge.
Bul kúnderi «Astana bankiniń» qyzmeti belsendi ekenin aıtýǵa bolady. Sońǵy úsh jylda bank ustanǵan strategııasy aıasynda turaqty damýdy kórsetip, barlyq basty elementteriniń jumysyn jónge saldy. Qazirgi tańda bank kartalaryn 300 myńnan asa klıent qoldanady. Banktiń qory aı saıyn 10-12 paıyzǵa ósip otyr. Jyl sońyna qaraı qoldanylatyn kartalar sany 500 myńǵa jetedi dep kútilip otyr.
«Astana banki» 2019 jyly Qazaqstanda mobıldik bank qoldanýshylarynyń sany jaǵynan kóshbasshyǵa aınalýdy kózdeýde. Oǵan qosa tranzaksııalyq bankıngti jan-jaqty damytyp, shaǵyn jáne orta bıznesti nesıeleýge keńinen qoldaý kórsetýde.
«Astana banki» basqarma tóraǵasy Eskendir Maılybaevtyń aıtýynsha, ınvestorlardan tartylǵan qarjy ary qaraı banktiń ónimder tizimin, IT-ınfraqurylymyn damytýǵa jáne de klıentter qoryn ulǵaıtýǵa baǵyttalatyn bolady.
«Frıdom Fınans» kompanııasy sabaǵattyq qoldaý kórsetetin ornalastyrymnyń anderraıteri bolyp tabylady, sondaı-aq, ol market-meıker rólin atqaryp, baǵa belgilenimin qoldaýmen aınalysatyn bolady.
«Biz bank aksıonerleri men basshylyǵynyń bıznes júrgizýdiń jańa aıqyndylyq deńgeıine ótýge degen umtylysy men baǵaly qaǵazdaryn tartymdy baǵa boıynsha iri ınvestorlarǵa ǵana emes, sondaı-aq, jeke tulǵalardyń keń tobyna usynýǵa degen nıetin barynsha qoldaımyz. Qarjy sektoryndaǵy jalpy toqyraýǵa qaramastan, biregeı naryqtyq strategııasy jáne bank kórsetkishteriniń aıryqsha ósýi arqasynda bank aksııalarynyń quny aıtarlyqtaı óse alatyndyǵyn kórip otyrmyz», deıdi «Frıdom Fınans» IK bas dırektory Tımýr Týrlov.
Baspasóz máslıhaty kezinde Qazaqstan qor bırjasy basqarma tóraıymynyń orynbasary Natalıa Horoshevskaıa: «Investorlardyń keń toby úshin «Astana banki» AQ-nyń aksııalaryn bastapqy ornalastyrý jalpy naryqqa da kompanııanyń ózine álbette oń yqpal etedi. Banktiń IPO aıasynda tabysqa jetýi kompanııanyń ınvestorlar seniminen shyǵa bilgendigin jáne korporatıvtik basqarýdyń joǵarǵy deńgeıine ótkendigin bildiredi», dedi.
О́z kezeginde KASE qor naryǵyn damytyp, Bırja aıasynda qarjy men jańa emıtentter tartý úshin emıtentterge barynsha qolaıly jaǵdaılardy usynýǵa umtylýda.
Aınash ESALI, «Egemen Qazaqstan»