Fılmdi Sh.Aımanov atyndaǵy «Qazaqfılm» kınostýdııasy men qytaılyq «Shineworks Pictures» jáne «China film coproduction corporation» kompanııalary birlesip túsiredi. Birlesken joba týraly ýaǵdalastyq 2015 jyly Qytaıda ótken «Jibek joly» II halyqaralyq kınofestıvali kezinde jasalǵan bolatyn. Al byltyr birlesken joba naqtylanyp, «Kompozıtor» atty kórkem fılmdi birlesip túsirý, qarjylandyrý jáne birlesip paıdalaný týraly kelisimge qol qoıylǵan. Endigi jerde fılmdi túsirý jumystary bastalyp ketpek. Almatyda túsiriletin fılmniń shyǵarmashylyq, qarjylyq resýrstary daıyn. Bul týraly áńgimelegen «Qazaqfılm» AQ vıse-prezıdenti Serik Jubandyqov fılmniń 80 paıyzy Almatyda, al jıyrma paıyzy Qytaıda túsiriletinin, degenmen montajdaý, kompıýterlik grafıka jaǵymen qytaı tarapy aınalysatynyn baıandady.
«Fılm túsirý ońaı. Qarjy máselesi, prokat jaǵy qıyn. Biz fılmniń smetasyn teń bólip aldyq. Eki jaq ta fılmdi túsirý úshin elý-elý paıyzdan qarjy shyǵarady. Keler jyly sáýirde fılm túsirilip bitedi. Maqsatymyz – Qytaı naryǵyna shyǵý. Fılmniń Qytaıdaǵy prokatyna Beıjiń qalalyq partııa komıteti kómektesetin bolady», dedi ol.
Qytaı kınogerlerimen birlesip túsirileıin dep jatqan «Kompozıtor» atty kórkem fılmge qos kompozıtor Baqytjan Baıqadamov pen Sı Sınhaıdyń dostyǵy arqaý etip alynǵan. Iаǵnı, ómirde bolǵan oqıǵanyń izimen túsirilmek. Sı Sınhaı – Qytaı Halyq Respýblıkasynyń Halyq kompozıtory ataǵyna ıe bolǵan, qysqa ǵana ǵumyrynda 300-den asa shyǵarmalar týdyrǵan dara talant ıesi. Ekinshi dúnıejúzilik soǵys kezinde saıası qýǵyn-súrgin kórgen ol ómiriniń sońǵy jyldaryn Qazaqstanda ótkizgen. Qazaqtyń kórnekti kompozıtory Baqytjan Baıqadamovpen dos bolǵan. Durysy, Sı Sınhaıdy ashtyq, qaıyrshylyq kúıden qutqaryp, qaıtadan shyǵarmashylyq ortaǵa oralýyna septigi tıgen Baqytjan Baıqadamov bolǵany qaı bir jyldary BAQ betterinde jarııalanǵan. Ol kezde eki talanttyń dostyǵy týraly rejısser Ásemǵazy Qapanuly 20 mınýttyq derekti fılm túsirgen edi. Qytaı mádenıetine úlken iz qaldyrǵan úlken tulǵanyń taǵdyry endi kórkem fılmge aınalyp, eki eldiń kórermenderine jol tartpaq.
«Kompozıtor» fılmin túsirý jumystary bastalǵany týraly sharaǵa Mádenıet jáne sport mınıstri Arystanbek Muhamedıuly, QHR Basylym, kıno, radıo, telehabar máseleleri boıynsha memlekettik ákimshiliginiń mınıstri Ne Chensımen birge eki taraptyń da kınogerleri, ártisteri qatysty. Aıta keteıik, atalmysh fılmniń rejısseri – Sherızat Iаqub, qoıýshy rejısseri – Sábıt Qurmanbekov. Olardan bólek basty rólderdi somdaıtyn Hý Djýn, Berik Aıtjanov jáne Altynaı Nógerbek te sharada qonaq retinde boı kórsetti.
Aıgúl SEIILOVA, «Egemen Qazaqstan»