Konsert shymyldyǵyn Almaty qalasynyń ákimi Baýyrjan Baıbek ashty. Ol Astana qalasynyń róli erekshe ekenin atap ótip, elordanyń elimizdiń jetistigin, bolashaqqa umtylysyn aıqyndaıtynyn jetkizdi. «Barlyq qazaqstandyqtar jaqsy kóretin Almaty – el tarıhyna táýelsizdiktiń altyn besigi retinde endi. Prezıdenttiń turaqty qamqorlyǵynyń arqasynda Almaty zamanaýı megapolıske aınalyp, eýropalyq qalalarmen básekege túse alatyn deńgeıge jetti. Almatynyń Astanadaǵy mádenı kúnderi aıasynda biz sizderge elimizdiń baı mádenı murasyn usynamyz»-dedi qala ákimi. Ol Prezıdenttiń halyqaralyq joǵary mártebesiniń arqasynda «EKSPO-2017» kórmesiniń Astanada ótkizilip jatqanyn aıtty. «EKSPO-2017» - bul zamanaýı tehnologııa men ınvestısııa tartý ǵana emes, sonymen qatar sanany ózgertý, ınnovasııalyq oılaýdy qalyptastyrý. EKSPO –bul Elbasy usynǵan rýhanı jańǵyrýdyń bir jobasy» - dedi B.Baıbek. Ol óz sózinde halyqaralyq kórme aıasynda ótkizilip jatqan mádenı kúnder barysynda, ıaǵnı, 11-19 maýsym aralyǵynda 400-den astam almatylyq ártister óz ónerlerin tartý etetinin habarlady.
Solaısha mádenı kúnder «Almatydan mahabbatpen» atty konsertpen bastaldy. Konsertte «Dosmuqasan» toby, Nurlan Abdýllın, Mádına Sádýaqasova, Marjan Arapbaeva, «Jigitter», «Keshıý» toptary, Aıqyn, Lýına, Roza Rymbaeva syndy elimizge tanymal óner juldyzdary án shyrqady. Al, Almatynyń memlekettik qýyrshaq teatry Q.Qýanyshbaev atyndaǵy qazaq mýzykalyq drama teatrynda kúnine eki ret qazaq jáne orys tilderinde «Qulynshaq pen bóltirik», «Kóńildi aıýlar» atty úzdik spektaklderin qoıatyn bolady. Sondaı-aq, «Almatynyń etno –aýyly» kórme jármeńkesi, «Sazgen sazy» folklorlyq-etnografııalyq ansambliniń jáne «Asqar taýly Almaty» konsertteri mádenı kúnder aıasynda kórermenderge tartý etiledi.
Aıgúl SEIILOVA, «Egemen Qazaqstan»