Kezdesý barysynda «Mektep medıasııasy: problemalary men bolashaǵy» atty taqyryp talqylandy.
Álem boıynsha keń taraǵan medıasııa daýlardy sotqa deıin retteýdi kózdeıtini belgili. Al mektep medıasııasy uǵymy neni meńzeıdi? Halyqaralyq medıator Tatıana Dronzınanyń aıtýynsha, mektepte ata-ana men muǵalim, muǵalim men oqýshy, basqa da mamandar arasynda daý-damaılar týyndaýy múmkin. Al keıde olar tym shekten shyǵyp jatady.
«Eń alǵash mektep medıasııasy 1980 jyldary AQSh-ta paıda bolǵan. Meniń oıymsha, bilim salasyndaǵy kez kelgen maman mektep medıasııasy uǵymymen tanys bolýy kerek. Mamandardyń aıtýynsha, ár mektepte bes-alty medıator bolǵany jón. Olar mekteptegi kıkiljiderdi sheshetin bolady», deıdi Tatıana Dronzına.
Onyń aıtýynsha, mekteptegi medıasııa – keshendi ádisteme. «Onyń maqsaty – balaǵa tárbıe berý, bilim berý salalarynda qaýipsiz orta qalyptastyrý. Iаǵnı, osy saladaǵy kez kelgen sýbekt arasyndaǵy daýlardy sheshýge medıasııanyń osy túri atsalysady», deıdi sarapshy.
Tatıana Dronzına aıtyp ótkendeı, bul ádis tek mektepterde ǵana qoldanylmaıdy. Sondaı-aq mektepke deıingi tárbıe, JOO, orta bilim beretin mekemeler, qıyn balalarmen jumys isteıtin ortalyqtar úshin, ata-analar úshin de paıdaly.
«Bul ádisteme balalardyń úlken ómirge aıaq basýyna, úlken áleýmettik ortaǵa tez beıimdelýine kómektesedi. Mektep medıatory eń aldymen bilim berý salasynda qyzmet etetin adam bolǵany jón», deıdi Dronzına.
Jıynda belgili bolǵandaı, olardy daıyndaý modýldi prınsıp boıynsha belgili bir baǵdarlamalar arqyly júzege asyrylady. Osy rette bul mamandardy psıholog nemese áleýmettik pedagogtardan qalaı ajyratýǵa bolady degen suraq týyndary sózsiz. «Mektep medıatory retinde ustaz da, pedagog, psıholog, áleýmettik pedagog ta qyzmet ete alady. Mektep medıasııasy osy mamandyqtardy tolyqtyryp tur deýge bolady. Onyń negizgi qyzmeti - bilim berý salasyndaǵy adamdar arasyndaǵy qarym-qatynastardy retteý», deıdi sarapshy.
Kezdesý barysynda saıası ǵylymdar doktory medıasııanyń bul túri óte mańyzdy ekenin erekshe atap ótti. Sondyqtan da onyń bolashaqta keń taraıtynyna senim bildirgen medıator qazirden bastap medıasııanyń osy túrin nazarǵa alý kerektigin atap ótti.
Esterińizge sala ketsek, 2017 jyldyń 26 qańtarynda Qazaqstan Respýblıkasy Joǵarǵy Sotynyń tóraǵasy Qaırat Mámı daýlardyń jekelegen sanattary boıynsha olardy medıasııa tártibimen sotqa deıingi retteýdi engizý boıynsha pılottyq jobany iske asyrý týraly erejege qol qoıǵan bolatyn. Al mektep medıasııasy Qazaqstan tájirıbesine áli engizile qoıǵan joq.
Gúlnur Qýanyshbekqyzy,
«Egemen Qazaqstan»