Mundaıda oıyn balalaryna qıyn. Aýyl irgesinde kúmisteı jyltyrap ózen aǵyp jatqannan keıin úlkenderdiń kózin ala berip sýǵa kúmp beredi. Saryaǵash aýdany Baǵys aýylynda da osyndaı jaǵdaı oryn aldy. Taýdan qulap aqqan aryq mańyndaǵy balalardyń qasynda qaltalaqtap júrgen bir jarym jasar Erjan sýǵa qulap ketedi. Ústi tynyq bolǵanymen, aǵysy qatty taý sýy búldirshindi qaqpaqylǵa alyp ala jónelgen. Kishkentaı Erjannyń kórer jaryǵy bar eken. Osy mezette úıinen shyqqan on úsh jasar mektep oqýshysy Demejan Altaı kómek suraǵan balalardyń shyrylyn estip, mán-jaıǵa qanyqqan soń sýǵa qarǵyp ketedi. Bir batyp, bir shyǵyp bara jatqan sábıdi qýyp jetip, jaǵaǵa alyp shyǵady. Taý sýynyń yzǵary ótip ketken sábı kókpeńbek bolyp talyp jatyr. Demejan Altaı jaǵaǵa jatqyzyp keýdesin basyp, jasandy dem aldyrǵanda kógerip jatqan sábı esin jınaıdy. Keıin qutqarýshylar kelgende on úsh jasar balanyń esh saspaı alǵashqy medısınalyq kómekti saýatty jasaǵanyna tańdanystaryn bildirgen. Keıde abdyraǵan úlkenderdiń ózi mundaıda asyp-sasyp qalar eken. Sábıdi qudaı bir ajaldan qaǵypty. Anyǵy, sol kúni tańerteńgilik Demejan jarysqa ketýi kerek bolǵan. Biraq, bir sebeptermen aıaldap qalypty. Eger ol úıden birer mınýt kesh shyqsa, Erjannyń jaryq álemmen qoshtasýy ábden múmkin eken. Búginde jetkinshek Demejan Altaıdyń erligi óz týǵan aýylyna ǵana emes, elge úlgi bolyp jatyr. Oblystyq tótenshe jaǵdaılar departamenti erjúrek ulandy medalǵa usynbaq nıette. Jaqynda óz taraptarynan alǵys hat tapsyrdy. Osyndaıda eske túsedi. Aqtóbe qalasynda kanal sýyna eki birdeı bala batyp, kómek suraǵanda jaǵadaǵy eresekter qutqarýǵa umtyla qoımapty. Bul – naǵyz ezdiktiń belgisi. Bireýge oq tıip, bolmasa mashına apatyna túsip jany qınalyp jatqanda, uıaly telefonmen taspaǵa tartyp, áleýmettik jelige salatyndar da kóbeıip keledi. Bul – azǵyndyq. Al Demejan Altaıdyki naǵyz erlik. Ol – beıbit kúnniń batyry. Izgilik pen ulttyq patrıotızmge mysal izdeseńiz, shartarapqa shabylmaı-aq qoıynyz, Demejan sııaqty jalyndy jastar janyńyzda júr.
Baqtııar Taıjan, «Egemen Qazaqstan»
Ońtústik Qazaqstan oblysy