Muntazdaı taza kóshelerimiz ben sándi ǵımarattarymyz kózdiń jaýyn alady. Jaınaǵan jasyl jelekti saıabaqtarymyz ben tarıhı qundylyqtarymyzdy beıneleıtin jaýharlarymyz, ónerimizben salt-dástúrimizdi pash etetin jádigerlerimiz jat jurttyqtardy qaıran qaldyryp jatqany anyq. Al nurlana qulpyrǵan aıtýly gúl shoqtary men gúl alańdary kóńil qusyn kókke ushyrady. Munyń bári úlken qýanysh ta, maqtanysh. Biraq...Iá, biraq.
Kórkimen de, sánimen de, saıası syndarly is-áreketterimen de álemge tanylyp úlgergen Astanamyzdyń damýy barsha qazaqstandyqty qýan- typ otyrǵany aqıqat. Bul oraıda, Elbasy elimizdiń barlyq qalalary boı túzeıtin, aýyl-aımaq súısine qaraıtyn elordamyzdy odan ári aıalaýǵa, onda turyp jatqan kóptegen elordalyqtardy qalanyń naǵyz qojaıyny bolýǵa, kóshe, aýlalardy taza ustaýǵa shaqyrdy. Bul tek elordamyzǵa ǵana qatysty aıtylǵan áńgime emes. Degenmen, bul úndeýge birqatar jandardyń qosylýǵa moıny jar bermeı me, áıteýir, nemquraıdy qaraıtyndary da bar ekeni kórinedi. Sondyqtan bolsa kerek, kezinde Elbasy quqyq qorǵaý qyzmetkerlerimen kezdesý barysynda usaq quqyq buzýshylyqpen kúresti jandandyrý kerektigin barynsha jerine jetkize aıtty. Alaıda, amal neshik, quqyq buzýǵa beıim jandardy ońaltýdyń sapasy jaqsarmaı tur.
Máselen, júrgizýshilerdiń bári biledi: kólikterdiń deni kósheni, aýlany lastaıdy. Al sol kólikterdiń keıbir júrgizýshileri áperbaqan, álde keýdesine nan pisken bireýler shyǵar, áýeli meni kórdińder me degendeı, shekken shylymyn aýyq-aýyq terezeden tysqa shyǵaryp qoıady. Eń soraqysy sol, shylymynyń tuqylyn kósheniń qaq ortasyna tastaı salady. Kólik ishinde jas balalar bolsa, anasy álgi balalary jegen táttiniń qaǵazyn terezeden laqtyrady. Tipti, joldyń jıegine toqtap, paket toly qoqysty, ıakı tamaq qaldyǵyn sol jerge tastap ketetinderi de bar. Odan ótken soraqylyǵy, keıbir júrgizýshi baǵdarshamnyń qyzyl shamyna kidirgende esikti ashyp jiberip túkire salady. Qaqyrynyp, sińbiretinder de kezdesedi. Al solardyń aldyn orap, «Oý azamat, munyńyz qalaı?!», dep kórińizshi, birden pálege qalasyz. Polısııa kelse, usaq quqyq buzýshylyq jasaǵan ol emes, siz bolyp shyǵa kelesiz. О́ıtkeni, dálel bolmaı qalady. Sodan soń «Ne kerek ózińe? Ne, seniń máshıneńniń ishine tastadyq pa?! О́zimiz bilemiz ne istesek te, jaıyńa júr! Áıtpese…», deıdi qaharlanyp.
Bul kóshedegi jaǵdaı bolsa, keıbir aýlalardaǵy kórinis te sondaı. Úıdeı kólikterin týra kireberiske taqap qoıady. Ol kólik taza bolsa bir sári, joq, shań basqan, maıy tamshylaǵan nemese saýyry satpaq, dóńgelekteri balshyq, bir sózben aıtqanda, jer-kóktiń bar kirin tórińizge alyp kelgen zııankestiń naǵyz ózi. Al onyń ıesi bolsa, kórdińizder ǵoı men qandaımyn degendeı, taltańdaı basyp, aýladaǵy kólikterden qalǵan shań-tozańnyń arasymen maıly daqqa toly qara qojalaq asfalt ústimen búldirshin balalaryn ertip bara jatady...Osylardyń bárin tań sáriden turǵan kóshe tazalaýshylar qalpyna keltirip jınap, qalpyna keltirip júrgeni. Osylaısha, jabýly qazan jabýly kúıinde qalyp keledi. Biraq bul qashanǵa deıin sozylmaq?
О́rkenıetti elderdiń adamdary ózderi turyp jatqan qalanyń, kósheleriniń, úı aýlalarynyń tazalyǵyna, ádemiligine, tynyshtyǵyna, jaılylyǵyna erekshe mán beredi. Úı aýlasyn, kósheni ózderiniń úıleriniń tórindeı kóredi. Sondyqtan da, ony aıalap ustaýǵa, bir tal sirińke tastamaýǵa tyrysady. Sóıtip, ózderine ózderi úıde de, túzde de qolaılylyq týǵyzyp, mádenıetti ómir saltyn ustanyp júredi. Bizge de nege solaı jasamasqa? Oılanatyn, órkenıetke qarap, boı túzeıtin ýaqyttyń jetkeni anyq qoı. О́z qalamyz ben dalamyzdy úıimizdeı aıalap ustaýǵa úıreneıik, aǵaıyn!
Aleksandr TASBOLATOV, «Egemen Qazaqstan»