Qazaq eli Táýelsizdik alǵan shırek ǵasyrdan astam ýaqyt ishinde tórtkúl dúnıege tarydaı shashylǵan dúnıe júzi qazaqtary Atajurtta besinshi ret bas qosyp otyr. Bul Táýelsizdiktiń arqasynda júzege asyp otyrǵany sózsiz.
Búgin Astanada Dúnıejúzi qazaqtarynyń V quryltaıyna álemniń 40 shaqty memleketinen kelgen 341 ókil elordadaǵy eńseli eskertkish − «Qazaq eli» monýmentine gúl shoqtaryn qoıý rásimine qatysady. Odan keıin qadirli qonaqtardy baǵdarlama boıynsha: Ulttyq mýzeı, Áziret sultan meshiti, Qazaqstan Respýblıkasynyń Tuńǵysh Prezıdenti − Elbasy kitaphanasymen tanystyrý sharasy ret-retimen atqarylmaq.
Bul quryltaıdyń basty ereksheligi – «Rýhanı jańǵyrý jáne sheteldegi qazaqtar» degen aıdarmen ótýi. Iаǵnı, jýyqta ǵana jaryq kórgen Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty ıdeologııamyzdyń baǵyt-baǵdaryna aınalǵan baǵdarlamalyq maqalasynda atap ótilgendeı, ulttyq damýymyzdyń basty tiregi bolatyn tujyrymdamalardyń búgingi quryltaı ıdeıasymen sabaqtasyp jatýy jıynnyń eń bir utymdy da sátti tusy ekeni sózsiz.
Dúnıejúzi qazaqtarynyń qaýymdastyǵy álemniń 32 elinde ornalasqan «Qazaq mádenı ortalyqtarymen» baılanysa otyryp, mártebeli jıynǵa qonaqtar shaqyrǵan.
Sol sııaqty, jıynǵa Qyrǵyzstannan – 20, Germanııadan – 9, Ázerbaıjannan – 7, Belarýsten – 5, Túrikmenstannan – 4, Fransııadan – 4, Tájikstannan – 3, AQSh-tan – 3, Ýkraına, Ulybrıtanııa, Shvesııa, Vengrııa elderiniń árbirinen – 2, Moldova, Danııa, Gollandııa, Chehııa, Fransııa, Kanada qatarly 15 elden bir-bir ókil shaqyrylypty.
Bıylǵy quryltaı qonaqtarynyń 80 paıyzǵa jýyǵy buryn qatyspaǵan jańa adamdar bolsa, osylardyń 60 paıyzdan astamy 35 jasqa deıingi jastar. Sondyqtan da jıyn barysynda «Nur Otan» partııasynyń qoldaýymen qazaq jastarynyń forýmy ótedi dep kútilýde. Forýmǵa sheteldik baýyrlarymyz jáne ózimizdiń «Jas Otan», «Jasyl el» sııaqty jastar uıymdary, «Bolashaq» baǵdarlamasy arqyly shetelde oqyp júrgen stýdentter qatysady.
Munyń syrtynda 5 mınıstrlikte seksııalyq otyrystar ótedi. Shetelden kelgen aǵaıyndar sol 5 topqa bólinip, ár azamat óz mamandyǵy, óz baǵyty, talap-tilegine qaraı ózi tańdaǵan seksııaǵa qatysady.
Quryltaıdyń úshinshi jańalyǵy – týǵanyna 100 jyl tolyp otyrǵan dintanýshy-ǵalym Halıfa Altaıdyń dataly mereıtoıyna oraı «Halıfa Altaı jáne qaıta oralǵan tarıh» atty halyqaralyq ǵylymı-praktıkalyq konferensııa ótkizilmek.
Eń basty shara – quryltaıdyń ashylý saltanaty 23 maýsym kúnine josparlanýda. Osy kúni Elbasynyń qatysýymen plenarlyq otyrys ótedi dep mejelenýde. Bul basqosýda asa mańyzdy negizi máseleler talqylanatyn bolady.
Oǵan deıin mártebeli meımandar elorda mańyndaǵy «Etnoaýyl» keshenimen tanysyp, sol kúni ótetin Aqmola oblysynyń mádenı kúnderine qatysady. Sońynda «Astana Opera» teatrynda «Qyz Jibek» operasyn tamashalaıdy. Osylaısha, dúnıeniń túkpir-túkpirinde tarydaı shashylǵan alashtyń urpaǵy Astana tórinde bas qosyp, ulttyń bolashaǵy tóńireginde áńgime qozǵap, eldiktiń erteńine qam jasaıdy. Qysqasy, «Bar qazaq – bir qazaq» bolyp, ajarly Astana tórinen asqaq ún qatady.
Beken Qaıratuly, «Egemen Qazaqstan»