Kezdesý barysynda Qazaqstan men Dúnıejúzilik densaýlyq saqtaý uıymy arasyndaǵy yntymaqtastyqty damytý perspektıvalary talqylandy. Gúlshara Ábdiqalyqova J.Iаkabty Tedros Adhanomnyń Dúnıejúzilik densaýlyq saqtaý uıymynyń jańa Bas dırektory bolyp taǵaıyndalýymen quttyqtady. Memlekettik hatshy Dúnıejúzilik densaýlyq saqtaý uıymynyń qoǵamdyq densaýlyq saqtaý júıeleri men qyzmetterin nyǵaıtýǵa baǵyttalǵan barlyq bastamalarynyń mańyzdylyǵyn atap ótti. Gúlshara Ábdiqalyqova elimizdiń densaýlyq saqtaýdyń, sonyń ishinde BUU-nyń ornyqty damý maqsattaryna qol jetkizýdiń ózekti máselelerin sheshý úshin Dúnıejúzilik densaýlyq saqtaý uıymymen birlesken jobalardy iske asyrýǵa belsendi atsalysyp otyrǵanyn aıtty. Memlekettik hatshy Qazaqstan Respýblıkasyndaǵy densaýlyq saqtaýdy damytýdyń memlekettik baǵdarlamasyn iske asyrýda, atap aıtqanda ana men bala densaýlyǵyn qorǵaý, ókpe aýrýynyń aldyn alý ári onymen kúresý, medısınalyq jáne farmasevtıkalyq bilim berý jáne t.b. máseleler boıynsha Dúnıejúzilik densaýlyq saqtaý uıymy tarapynan qoldaý kórsetilip jatqanyn atap ótti. Áńgimelesý barysynda Dúnıejúzilik densaýlyq saqtaý uıymynyń geografııalyq turǵydan shalǵaıda ornalasqan Almaty qalasyndaǵy Alǵashqy medısınalyq-sanıtarlyq kómek kórsetý ofısi qyzmetiniń máseleleri talqylandy. Sondaı-aq, Gúlshara Ábdiqalyqova Qazaqstannyń Almaty qalasynda BUU-nyń kópjaqty dıplomatııa jónindegi habyn qurý bastamasy týraly aıtty. J.Iаkab Qazaqstannyń densaýlyq saqtaý salasy boıynsha júrgizip otyrǵan saıasatyna rızashylyq bildirdi.
Qymbat Toqtamurat, «Egemen Qazaqstan»