Birneshe jyl buryn kenshiler qalasynyń bas kóshesi – Lenın kóshesine áýlıe babamyzdyń esimi berilgende, bórkin aspanǵa atyp shattanǵan halyqtyń qýanyshy eselene tústi. Eskertkishtiń ashylý saltanatyna oblys ákimi Bolat Baqaýov, máshhúrtanýshy Aıtmuhambet Turyshev, Máshhúr Júsip Kópeıulynyń urpaqtary, alys-jaqynnan kelgen qonaqtar qatysty. Aımaq basshysy Bolat Baqaýov pen ǵulamanyń shóberesi Abaı Shárapıev eskertkish jamylǵysyn túsirgen soń, S.Toraıǵyrov atyndaǵy №22 gımnazııa-mektebiniń oqýshysy Baýyrjan Kákimov pen «Zerde» mektebiniń oqýshysy – Máshhúr Júsip babanyń shópshegi Perızat Súıindik aqyn óleńderin oqydy. Ekibastuzǵa kireberis tusqa erekshe reń berip, el rýhyn kóterip turǵan qola eskertkish bıiktigi tuǵyrtasymen qosa eseptegende 7 metrge jýyq. Avtory –qaraǵandylyq músinshi Jaýbasar Qalıev. Atap óterlik jaıt, 60 jyldyq mereıtoıyn atap ótken kenshiler shaharynda qazaqtyń daryndy uldaryna arnap buǵan deıin talaı eskertkish soǵylǵan. Alaıda búgingi eskertkish eń kórkem ári sátti jasalǵany deýge bolady. Eskertkishtiń ashylýyna Ekibastuz qalasynyń ákimi Qaırat Núkenov qoldaý tanytyp, «Ekibastuz qalasyndaǵy Máshhúr Júsip qoǵamdyq qory» (prezıdenti – Baqtybaı Amantaev) úlken eńbek sińirdi.
Janargúl QADYROVA
Ekibastuz