Astana áýejaıy – bas qalanyń ǵana emes, táýelsiz elimizdiń negizgi qaqpasy, basty áýe dálizi. Qazaqstandy álem Elbasynyń kóregen saıasaty, kemel oı men kenen aqyly, batyl da táýekelshil bastamasy arqyly tanydy. Sondyqtan endigi jerde elimizdiń bas qaqpasyna tabany tıgen árbir azamattyń aldynda dál osy qundylyǵymyzdy odan saıyn aıshyqtaı túsetin bolamyz. Qazaqstan halqynyń ortaq qalaýy bir arnaǵa toǵysyp, tarıhı strategııalyq mańyzdy sheshim shyǵarylǵany − biz úshin zor maqtanysh, úlken mártebe. Táýelsiz elimizdiń terezesi teń, keregesi keń memleket bolǵanyna 26 jylǵa aıaq bassa, eldiń bas qalasy − Astananyń ajarlanyp, sáýletimen de, dáýletimen de bereke men beıbitshiliktiń rýhanı ordasyna aınalǵanyna týra 20 jyl tolǵaly otyr. Áýejaıǵa Elbasy esiminiń berilýi osy mańyzdy mereıtoı qarsańynda eldiń eldigin, erdiń erligin tereńnen tanyta túsetin qutty qadam boldy dep bilemiz. Bul – Elbasyna dara saıasatker retindegi tulǵasy men ólsheýsiz eńbegine halyqtyń bergen laıyqty baǵasy. Biz únemi áýede júremiz, máńgi asqaq kórinetin aspanda qyrandaı qalyqtaǵan áskerı qyzmetimizde bizden qalt jibermes qyraǵylyq talap etiledi. Osy jaýapty da kúrdeli qyzmet barysynda elimizge záý bıikten kóz sala júrip, boıymyzdy únemi maqtanysh sezimi bıleıdi. Endi Astana áýejaıynyń aty atalyp, tóbesi kóringen saıyn bizdiń júregimizde sol eljandylyq sezimi eselene túsetin bolady. Bul – qalyń elimizdiń Elbasyn jurtynyń baǵyna týǵan, adamzatqa ortaq perzent dep qasterleıtininiń, táýelsiz elimizdiń bas ıesi, qaharman uly dep baǵalaıtynynyń belgisi. Elbasymen birge elimizdiń alar asýy, shyǵar bıigi, jeter tabysy áli de alda ekenine shúbásiz senimdimiz. Elbasymyz Alashtyń baqyty úshin aman bolsyn. Kóregen kóshbasshylyǵymen Qazaqstannyń abyroıy, halyqtyń aýyzbirligi arta bersin!
Aıdyn AIYMBETOV, áskerı ushqysh-kosmonavt, Qazaqstan Áskerı-áýe kúshteriniń general-maıory, Halyq qaharmany jáne Taldyqorǵan áýe bazasynyń ushqyshtary Almaty oblysy