Memleket basshysynyń bastamasymen uıymdastyrylǵan bul aýqymdy shara elimizde de ǵylymnyń, ınnovasııanyń damýyna jańa serpin bergeni daýsyz. XXI ǵasyrda kez kelgen memlekettiń áleýeti qarýynyń kúshimen emes, zamanaýı tehnologııalar salasyndaǵy jetistigimen baǵalanatynyna kóz jetkizip otyrmyz. Qazaqstannyń qazirgi saıasaty shıkizat óndirýmen shektelmeı, bıologııalyq alýan túrligimizdi, energııanyń jańa kózderin paıdalana otyryp, ınfraqurylymdy joǵary deńgeıde damytýǵa ekologııalyq taza ónim shyǵarýǵa, ekologııalyq qaýipsiz orta qurýǵa baǵyttalǵan. Bul rette Sáken Seıfýllın atyndaǵy Qazaq agrotehnıkalyq ýnıversıteti elimizdegi aýyl sharýashylyǵy mamandaryn daıarlaıtyn eń beldi oqý oryndarynyń biri retinde biraz jyldan beri álemdegi belgili oqý oryndarymen, ǵylymı ortalyqtarmen tyǵyz áriptestikte jumys istep keledi. Osydan tórt jyl buryn Elbasymyzdyń Jibek joldary elderiniń qarym-qatynasyn nyǵaıtý týraly bastamasy Qytaı eli tarapynan qoldaý taýyp, kórshi elmen agrarlyq ǵylym salasyndaǵy baılanystardy nyǵaıtýǵa múmkindik aldyq. Astana qalasynyń aınalasynda jasyl beldeý qurý, jańa ónim túrlerin suryptaý, jańa daqyldar shyǵarý, aýyl sharýashylyǵy tehnıkasyn qurastyrý – búginde halyqaralyq baılanystar aıasynda qol jetkizgen jumystarymyzdyń azǵantaı bóligi ǵana.
Jaqynda Beıjińde ótken «Bir beldeý, bir jol» forýmynyń aıasynda qytaılyq áriptesterimizdiń shaqyrýymen QHR Aýyl sharýashylyǵy Ǵylym akademııasynyń 60 jyldyǵyna oraı uıymdastyrylǵan dúnıejúzilik sammıtke qatysýǵa múmkindik týdy. Jıynda Qazaqstannyń aýyl sharýashylyǵynyń jetistikteri týraly baıandama jasadym. Álemniń 30-dan astam eliniń ǵalymdary men joǵary oqý orny jetekshileriniń basyn qosqan bul jıynda agrarlyq salanyń jahandyq damý úrdisteri talqylanyp, salanyń bolashaǵy týraly ortaq ustanym qalyptastyrýǵa betburys jasaldy. Aıta keterligi, basqosýǵa qatysýshy kóptegen ataqty ǵalymdar, JOO basshylary, kásipkerler elimizdegi EKSPO-ǵa úlken qyzyǵýshylyq tanytyp, qatysatyndyqtaryn bildirip otyr. Osy múmkindikti paıdalanyp, aǵymdaǵy jyly 3-5 shilde aıasynda Qazaqstanda tuńǵysh ret S.Seıfýllın atyndaǵy QazATÝ bastamasymen Jibek joly boıy elderiniń aýyl sharýashylyǵyndaǵy bilim jáne ǵylym jónindegi halyqaralyq alıansynyń jıyny ótkizilgeli otyr. Bul – respýblıkamyzdyń agrarlyq ǵylymy men biliminiń tarıhynda tuńǵysh ret ótetin shara. Byltyr Qytaı aýyl sharýashylyǵy akademııasynyń uıytqysymen qurylǵan bul alıansqa 40-tan astam eldiń joǵary oqý oryndarynyń rektorlary, ǵalymdary kiredi. Maqsat – agrarlyq saladaǵy máselelerdi birlese sheshý. Atalǵan jıynǵa shetelderdiń 40-qa jýyq joǵary oqý oryndarynyń rektorlary, akademııalar men ǵylymı-zertteý ınstıtýttarynyń basshylary qatysýǵa nıet bildirdi. EKSPO-men tuspa-tus uıymdastyrylyp otyrǵan bul sharaǵa kelgen qonaqtarymyz halyqaralyq kórme jetistikterimen, elimizdiń ekonomıkalyq, áleýmettik, ǵylymı-ınnovasııalyq, mádenı, rýhanı áleýetimen jan-jaqty tanysady. Bul óz kezeginde Qazaqstannyń jahandyq damý kóshinen óziniń laıyqty ornyn alýyna yqpal etetinine senemiz.
Aqylbek KÚRIShBAEV,
S.Seıfýllın atyndaǵy Qazaq agrotehnıkalyq ýnıversıtetiniń rektory, aýyl sharýashylyǵy ǵylymdarynyń doktory, professor