Al Astana ýaqytymen saǵat 13:00-degi jaǵdaı boıynsha 16 óńirde Qazaqstan Respýblıkasy Parlamenti Senatynyń depýtattyǵyna kandıdattardy saılaýda daýys berýdiń aldyn ala qorytyndylary shyǵaryldy.
Qazaqstan Ortalyq saılaý komıssııasynyń hatshysy Baqyt Meldeshovtiń sózine súıensek, aldyn ala qorytyndy boıynsha Aqmola oblysynan Dáýren Ádilbekov, Aqtóbe oblysynan Muhtar Jumaǵazıev, Almaty oblysynan Nurlan Qylyshbaev, Atyraý oblysynan Ǵumar Dúısembaev, Shyǵys Qazaqstan oblysynan Dúısenǵazy Mýsın, Jambyl oblysynan Abdaly Nuralıev, Batys Qazaqstan oblysynan Narıman Tóreǵalıev, Qaraǵandy oblysynan Rysqalı Ábdikerov, Qyzylorda oblysynan Murat Baqtııaruly, Qostanaı oblysynan Jeńis Nurǵalıev, Mańǵystaý oblysynan Baqtybaı Shelpekov, Pavlodar oblysynan Nurjan Nursıpatov, Soltústik Qazaqstan oblysynan Erik Sultanov, Ońtústik Qazaqstan oblysynan Álimjan Qurtaev, Astana qalasynan Edil Mamytbekov jáne Almaty qalasynan Dınar Núketaeva basym daýysqa ıe bolǵan.
«Saılaý naýqanyna qatysqan halyqaralyq baıqaýshylardyń sany − 172. Sheteldik BAQ ókilderiniń sany − 116. Barlyǵy − 288 baıqaýshy. Saılaý naýqany elimizdiń Saılaý týraly zańnamasy talaptaryna sáıkes ótti. Aryz-shaǵymdar osy ýaqytqa deıin Ortalyq saılaý komıssııasyna kelip túsken joq», dedi B.Meldeshov.
Aıta keteıik, eń kóp daýys jınaǵan kandıdattardyń arasynda is basyndaǵy 4 senator bar.
«Qazaqstan Respýblıkasyndaǵy saılaý týraly» Konstıtýsııalyq zańnyń 78-baby 2-tarmaǵyna sáıkes, oblystyq, Astana jáne Almaty qalalyq aýmaqtyq saılaý komıssııalarynyń daýystardy sanaý hattamasy saılaý kúninen bastap eki kúnnen aspaıtyn merzim ishinde Ortalyq saılaý komıssııasyna jiberiledi.
Olardyń negizinde Ortalyq saılaý komıssııasy respýblıka boıynsha tutas alǵanda saılaý qorytyndylaryn saılaý ótkizilgen kúnnen bastap jeti kún merzimnen keshiktirmeı, ıaǵnı 5 shildege deıin shyǵarady.
Baýyrjan Muqanov, «Egemen Qazaqstan»