«Rıts-Karlton» otelinde ótken «Úrker» ulttyq syılyǵyn saltanatty tapsyrý rásiminde Aqparat jáne kommýnıkasııalar mınıstri Dáýren Abaev barlyq BAQ ókilderin tól merekesimen quttyqtaı kele, mundaı iri syılyqtyń taǵaıyndalýy jýrnalıster mártebesin nyǵaıtýǵa degen alǵashqy qadamdardyń biri ekenin atap ótti. «О́zderińiz bilesizder, «Buqaralyq aqparat quraldary týraly» Zańǵa ózgerister men tolyqtyrýlar engizilmek. Osyǵan oraı jýrnalısterdiń mártebesin kóterýge qatysty kóptegen saýaldar kelip túsip jatyr. Búgingi «Úrker» ulttyq syılyǵy osy baǵytta jasalyp jatqan úlken qadam dep bilgeısizder. «Úrkerdiń» bedeli bıiktep, tanymaldylyǵy arta bersin», dedi mınıstr.
Budan keıin ol «Qazposhta», «Qazaqstan temir joly», «Astanatelekom» men «Qazaqtelekom» kompanııalarynyń birqatar qyzmetkerin marapattady. Al «Habar» arnasy, «Vechernıaıa Almaty» gazeti, «Ádebıet portaly», «Jetisý» arnasy men Ishki ister mınıstrliginiń qyzmetkerlerine «Aqparat salasynyń úzdigi» tósbelgisi tabystaldy.
Aqparat jáne kommýnıkasııalar mınıstrliginiń bastamasymen uıymdastyrylǵan «Úrker» ulttyq syılyǵy 15 atalym boıynsha úmitkerlerdi iriktedi. Júlde qory da qomaqty – 15 mıllıon teńgeni quraıdy.
«Úrkerge» qatysýǵa ótinim bergen 800-den astam úmitkerdiń ishinen 75-i nomınant retinde tańdalyp alynǵan. Olarǵa kórsetilgen qurmet te erekshe boldy. Fınalǵa joldama alǵandar qyzyl kilemniń ústinen júrip ótip, jankúıerlerdiń ystyq yqylasyna bólendi. Ár atalymǵa bes úmitkerden kelip, olardyń ishinde úzdikterdiń úzdigi ataýly syılyqtarǵa ıe boldy.
Sonymen, «Úrker» ulttyq syılyǵynyń «Úzdik fototilshi» atalymynda «Egemen Qazaqstannyń» fototilshisi Erlan Omarov jeńimpaz atandy. Gazet úshin fototilshiniń orny bólek. Basylym betteriniń sánin keltirip, mán-mańyzyn ashatyn da – fototilshiniń sýretteri. Osy turǵydan kelgende bizdiń Erlan – gazetimizdiń naǵyz «sur mergeni». Onyń qyraǵy kózi kez kelgen utymdy sátterdi qalt jibermeıdi. Sýretteriniń shynaıy ári utymdy shyǵatyny da sondyqtan.
Al «Úrkerdiń» «Úzdik jýrnalıstik zertteý» atalymynda jeńimpaz bolǵan «Egemen Qazaqstan» gazetiniń ardager jýrnalısi, belgili qalamger Janbolat Aýpbaevtyń esimi kópshilikke jaqsy tanys. Syılyqty ıesine tapsyrar sátte Parlament Májilisiniń depýtaty Saýytbek Abdrahmanov: «Men tapsyrǵaly otyrǵan syılyq ıesiniń atyn oqyǵanda júregim erekshe tolqydy. О́ıtkeni, ol – qazaq jýrnalıstıkasynyń jaryq juldyzy. Jýrnalıstıkany kásip etken jastarǵa da, jasamystarǵa da úırenetin úzdik úlgini 40 jyldan astam ýaqyttan beri kórsetip kele jatqan asyl azamatymyz – Janbolat Aýpbaev», dep erekshe qurmetin bildirdi. Iá, Janbolat Aýpbaev talaı tańǵajaıyp taǵdyrly azamattardy, sırek kezdesetin talanttardy oqyrmanǵa jetkizip kele jatqan erekshe qalamger. Onyń árbir jazbasynan avtordyń azamattyq jýrnalıstıkany ustanatynyn anyq ańǵarýǵa bolady. О́zi de: «Eger adam meıirimdilikti murat tutsa, izgilikti janyna serik etse, jaqsylyqqa jany qumar bolsa, qurmet te, ataq-dańq, abyroı da – sonyń jaǵynda. Qalam ustaǵan qaýym osyndaı úlken múmkindikke ıe. Qazirgi qoǵamda qatygezdik, qaradúrsindilik, qarabaıyrlyq, eptegen mádenıetsizdik uǵymdar beleń alyp barady. Al jýrnalıster ımandylyq pen ıgilik jolynda qyzmet etse, qoǵam da meıirlenip, izgilene túser edi», deıdi. Osyndaı qarymdy qalamgerdiń úzdikterdiń úzdigi atanýy zańdy da.
Taǵy bir qyzmetkerimiz Dýman Anash «Qazaqstan týraly úzdik tanymdyq materıal» atalymynda jeńis tuǵyrynan kórindi. Ol da oralymdy oılarymen, qoǵamnyń túıtkilderin dóp basatyn zerektigimen respýblıkaǵa tanylyp qalǵan jas daryn.
Bulardan ózge, taǵy birqatar atalymdar boıynsha jeńimpazdardyń esimi belgili boldy. Atap aıtqanda, «Úzdik saraptamalyq materıal» atalymynda «Kazahstanskaıa pravda» respýblıkalyq gazetiniń jýrnalısi Valentına Fıronova, «Úzdik radıobaǵdarlama» atalymynda Shalqar radıosynyń «Án dombyra» baǵdarlamasy, «Úzdik reportaj» atalymynda National Digital History portalynyń tilshisi – Oljas Berkinbaev jeńiske jetse, «Úzdik aımaqtyq radıostansııa» – «Astana» radıosy, «Úzdik salalyq basylym» – «Drýjnye rebıata» gazeti, «Úzdik jyl jýrnaly» «National Geografic Qazaqstan» jýrnaly tanyldy. Al «Jýrnalıstıkadaǵy debıýt» atalymynda «7kun.kz» saıtynyń jýrnalısi Móldir Imanmádı, «Úzdik suhbat» atalymynda «Kapıtal» respýblıkalyq gazetiniń tilshisi Vıktorııa Govorkova, «Úzdik aımaqtyq basylym» retinde Ońtústik Qazaqstan oblysynyń jergilikti «Reıtıng» gazeti, «Úzdik halyqaralyq saraptamalyq materıal» atalymynda «vlast.kz» saıtynyń jýrnalısi Zarına Ahmatova úzdik shyǵyp, jeńimpaz atandy. «Qaznettegi medıa serpilis» atalymynda «Massaget.kz» jastar saıty úzdik shyqsa, «Úzdik respýblıkalyq basylym» atalymynda «Aıqyn» respýblıkalyq gazeti jeńiske jetti.
Jeńimpazdardyń árqaısysy 1 mln teńge kóleminde aqshalaı syılyqqa ıe boldy.
«Úrker» syılyǵyn uıymdastyrýdaǵy basty maqsat – talantty jýrnalısterdiń eńbegin ózgelerge úlgi ete otyryp, olardyń óz kásibine degen qulshynysyn oıatý jáne daryndy mamandarǵa qoldaý kórsetý. Al konkýrsqa kelip túsken jumystardy elimizge tanymal tulǵalardan quralǵan qazylar alqasy sarapqa saldy.
Qymbat Toqtamurat, «Egemen Qazaqstan»
Sýretterdi túsirgen Orynbaı Balmurat, «Egemen Qazaqstan»