Elbasymyzdyń esimi kúlli álemge halqyn órge súıregen biregeı basshy retinde tanylyp, estile bastaǵannan beri dúnıejúzi elderi Qazaqstan memleketin moıyndap, jaǵymdy, jaqsy aty úshin jaqynyraq tanyǵysy keletin raıyn baıqata bastady. Qazaqstanǵa tartylyp jatqan ınvestısııalar, kelip jatqan dańqty tulǵalar, saparlap júrgen saıasat serkeleri, ótip jatqan bedeldi basqosýlar – sonyń aıǵaǵy. Qazaqstan búginde tatýlyqtyń, beıbitshiliktiń altyn besigine aınaldy. Sonaý Táýelsizdiktiń alǵashqy jyldarynyń ózinde-aq N.Nazarbaev basqarǵan Qazaq eli jer betindegi turaqtylyq pen qaýipsizdikti saqtap qalýdy qoldaıtyn ozyq memlekettiń úlgisin kórsetip, shartaraptaǵy jurttyń bárin tynyshtyqqa shaqyrdy. Mine, sodan beri alǵashqy kirpishin óz qolymen qalaǵan Astanany beıbit kelisimderdiń alańyna aınaldyrdy. Jer júzindegi alpaýyt elderdiń arasyndaǵy teketires kúsheıgen kezinde alaqandaı ǵana Astana araaǵaıyndyq júgin kóterip, kózqarasy qaıshy memleketterdi bir múddege ortaqtastyrý úshin bir ústeldiń basyna otyrǵyzdy. Saıasat qaıshylyǵyn, din alaýyzdyǵyn retke keltirý úshin ózara túsinistikke bastaıtyn mámileler jasaýǵa uıytqy boldy. Astana az ǵana ýaqyttyń ishinde dúnıejúziniń dana basshylary bas qosatyn saıasattyń qalasyna aınalyp shyǵa keldi. Az eńbek emes. Az deımiz-aý, ushy-qıyry joq osy eńbektiń bári atan jilik azamat qana kótere alatyn nardyń júgi emes pe. Elbasymyzdyń júrgen jeri – beıbitshilik. Qaıda barsa da ymyrany, yntymaqty ózimen birge ala júredi. Elimizdiń amandyǵy, jerimizdiń tynyshtyǵy úshin dál bizdiń Elbasymyzdaı alańdap, kún demeı, tún demeı, táýligine neshe saǵat aspanda ushyp, jurtynyń qamy úshin janushyryp júrgen eljandy basshy neken-saıaq bolar dep oılaımyn. Memleket tizginin ustaǵan soń bári de jurtynyń jaıyn oılaıdy ǵoı, biraq bizdiń Prezıdentimizdiń perzent retindegi paryzyn tereń túsinýi jáne soǵan saı halqyna adal qyzmet qylýy alabóten sııaqty kórinedi. Eli Elbasyny qoldap, Elbasymyz eline súıeý bolyp atqaratyn qyrýar sharýa shash etekten alda áli kútip tur. Dúnıe júzinde tuńǵysh ret álemdegi teatrlardyń festıvalin jas Astanada ótkizýiniń ózi nege turady! Mundaı halyqaralyq keń aýqymdy sharany ótkizýge eki eldiń biri bel sheship kirise almaıdy. Qarajatyn aıtpaǵanda, buǵan qanshama kúsh-qaırat jumsalady. Prezıdenttiń pármenimen ótkizilgen festıvalge Qazaqstanǵa ǵumyry tabany tıip kórmegen ózge eldiń talanttary jınalyp, óz ónerin kórsetip, basqanyń da ónerin paryqtap, búgingi teatrdyń baǵyt-baǵdaryn salystyryp, saralaý úshin zor múmkindikke ıe boldy. Al mundaı baǵa jetpes tájirıbe almasýlar elimizdiń teatr ónerin taǵy bir beleske kóterip tastaıtyny anyq. Bir ǵana teatr óneriniń ózi osynshama baılyqqa kenelgende, basqa salalar boıynsha ótkizilip jatqan myń san salmaqty sharalardyń elimizge, halqymyzǵa berer ıgiligin, paıdasyn sanamalap shyǵý tipti de múmkin emes. Esmuhan OBAEV, Qazaqstannyń halyq ártisi, professor ALMATY
Qazaqtyń mańdaıy ashyq, tileýi durys halyq bolǵan soń bolýy kerek, peshenesine Nursultan Nazarbaev sekildi parasatty adamdy Prezıdent etip syılap, jeri úlken bolsa da, halqy az memleketti álemge máshhúr etý mindetin amanattapty.