Bıyl da Taraz jurtshylyǵy Astana kúnin aıryqsha saltanatpen qarsy aldy. Turǵyndar men memlekettik qyzmetshiler birlesip aıtýly kúnge aıtarlyqtaı syı ázirlep, ortalyq «Dostyq» alańyna jınaldy. Jınalǵan kópshilik aınalaǵa merekelik kóńil-kúı syılap, merekelik saltanat ortalyq alańnan bastaý aldy.
Búgin Taraz qalasy turǵyndary arasynda «Jaınaı ber, jarqyraı ber, Astana» atty jeńil atletıkalyq júgiris ótti. Oǵan oblys ákiminiń apparaty, oblys ákimdiginiń basqarmalary, quqyq qorǵaý jáne sot organdary, aýmaqtyq basqarmalar men mekemeler, aksıonerlik qoǵamdar, Taraz qalasynda ornalasqan kásiporyndar men mekemeler, sondaı-aq, qala turǵyndary qatysty.
Bul kúni ortalyq «Dostyq» alańyna jınalǵan 400-den astam adam Tóle bı kóshesiniń boıymen Qazaqstan Respýblıkasy Tuńǵysh Prezıdentiniń saıabaǵyna deıin 3 shaqyrym qashyqtyqty jaıaý baǵyndyrdy. Aıta keteıik, Astana kúnine arnalǵan jarysty oblystyq dene shynyqtyrý jáne sport basqarmasy, Jambyl oblysynyń jeńil atletıka federasııasy men Taraz qalasynyń ákimdigi uıymdastyrdy.
«Jarysty uıymdastyrýdaǵy negizgi maqsat – Astana kúni merekesin atap ótý, Taraz qalasy turǵyndary arasynda buqaralyq sport túrlerin damytý jáne salaýatty ómir saltyn nasıhattaý. Sonymen qatar, qala turǵyndaryn dene shynyqtyrý jáne sportpen júıeli túrde aınalysýǵa tartý, jeńil atletıkamen shuǵyldanýǵa qyzyǵýshylyǵyn arttyrý», deıdi uıymdastyrýshylar. Al merekelik jarysta belsendilik tanytqan azamattarǵa arnaıy estelik syılyqtar men sertıfıkattar tabys etildi.
Hamıt Esaman,
"Egemen Qazaqstan"
Jambyl oblysy