Kóterme-bólshek saýda ortalyqtarynyń júıesi atalǵan aımaqtaǵy elderde azyq-túlik, kókónis, halyqtyq taýarlar satýmen aınalysatyn saýda kásiporyndarynyń bazasyna negizdelgen. Endi ortalyq bazasynda belgili taýarlar saqtalatyn bolady. Ony kóterme jáne bólshek saýdamen aınalysatyndar aldyn ala tapsyrys boıynsha da ala alady.
«Buryn saýdagerler taýarǵa ózi baratyn bolsa, endi ony ortalyqqa jetkizetin bolamyz. Satýshyǵa endi Qyrǵyzstanǵa baryp, alyp-satarlardy jaldaýdyń qajeti joq. Endi osy júıe boıynsha taýar aradaǵy deldalsyz tikeleı ortalyqtarǵa túsedi. Sonyń arqasynda baǵa tómendeıdi. Taýar konsıgnasııa sharty boıynsha satylady, ıaǵnı, konsıgnant (taýar ıesi) taýaryn qoımaǵa ótkizý arqyly satýshyǵa bere alady. Osy jaǵdaıda, taýar tolyǵymen satylǵanǵa deıin ıesiniń múlki bolyp esepteledi. Bul taýar aınalymyna dem beredi», dedi Qazaqstan Saýda kásiporyndary qaýymdastyǵynyń prezıdenti Nursadyq Ábishev.
Kóterme-bólshek saýda ortalyqtary jobasyna qazaqstandyq taraptan Almatydaǵy «Mızam» saýda ortalyǵy, Astanadaǵy «Bıg Shanhaı», Atyraýdaǵy «Dına» kesheni qatyssa, Qyrǵyz eli tarapynan Ortalyq Azııadaǵy iri saýda orny «Dordoı» bazary enbek. Bolashaqta jobaǵa О́zbekstan men Reseıdiń de qatysýy yqtımal.
Qazirgi ýaqytta Qazaqstan Saýda kásiporyndary qaýymdastyǵy, Qyrǵyzstan bazarlar men saýda kásiporyndary qyzmetiniń qaýymdastyǵy jáne «Soıýzplodovosh» halyqaralyq qaýymdastyǵy atalǵan jobaǵa 30 mln teńge ınvestısııa saldy. 8 tamyzdan bastap, onlaın-alańdardyń tolyq nusqasy iske qosylady.