Balalar da, úlkender de qýandy

Atyraýda 400 oryndyq balabaqsha, 60 páterli turǵyn úı paıdalanýǵa berildi «BALAPAN» – BALAQAILAR MEKENI. Jańadan paıdalanýǵa berilgen balabaqshany «Balapan» dep ataý uıǵary­lypty. Biraq bul jańadan boı kótergen ǵımarat emes. Buryn da balabaqsha ǵıma­raty bolǵan. Sonaý bir jyldary bul ǵımarat sport mektebine aınalǵan eken. Endi kishkentaı balaqaılar úshin mektepke deıingi tárbıe beretin mekeme retinde qaıta­dan esik ashty. Ras, jaz boıy munda «Snab­OılStroı» seriktestigi kúrdeli jóndeý jumystaryn júrgizdi. Bastapqy jobasyna qosa 120 oryndyq ǵımaratty japsarlata salyp berdi. Seriktestik basshysy Qaırat Jaılaýovtyń pikirinshe, qurylys jumysta­rynda 66 adam  eńbek etipti. Sóıtip, munda endi 400 bala bir mezgilde tárbıe alýǵa jol ashyldy. Balabaqshanyń ár bólmesi oıyn, ashana, sport quraldarmen, ózge de jab­dyqtarmen tolyq qamtylǵan. «Balapannyń» meńgerýshisi Naýsha Aman­janqyzynyń aıtýynsha, munda ázirge 100 bala qabyldanypty. «Biraq bul balabaq­shaǵa bala kelmeıdi degen sóz emes. Jaqyn arada bizge №54 jáne №55 balabaqsha­lardaǵy kishkentaı balaqaılar aýysady. Jyl aıaǵyna deıin balabaqsha 400 bala qabyldaıtyn bolady», deıdi meńgerýshi. Al balabaqshaǵa qabyldanǵandar tek qazaq balalary ǵana emes, ózge ulttyń balaqaı­lary da kóp munda. Jáne ózge ult balalary qazaq tiline jetik, kórkemdep óleń oqyǵandary eriksiz tańqaldyrady. – Balalardy ultyna qaramaı, osy jastan memlekettik tildi meńgerýge qulshyn­dyra túsý qajet, – dedi oblys ákimi Bergeı Rysqalıev «Balapan» balabaqshasynyń ashy­lý salatnatynda. – Ár bala memlekettik tildi  jetik bilýmen birge, ulttyq qundy­lyqtardyń, táýelsizdiktiń qadirin sezinip óskeni jón. AÝYLDAN QALAǴA QONYSTANDY. Atyraýdyń irgesinde eldi mekender kóp. Bárinde de turǵyndar jol, jaryq, sý sekildi turmysqa qajettilikterge qol jetkizgendikten, eshkimge renish bildirmeıdi. Ataýynan ǵana baıqalmasa, aýyl ekendigi elenbeıdi. Al Peshnoı atalatyn aýylda   bulaı emes. Bul aýylǵa Atyraý qalasynan qatynaıtyn jol da joq. Tabıǵı gaz, aýyz sý jelilerin aıtpaǵanda, telefon baılanysy turǵyn­dardyń óńi túgili túsine de kirip kórmegen. Solaı bolsa da Peshnoı aýylyndaǵy tur­ǵyndar ótken ǵasyrdyń 50-shi jyldarynan beri qıyndyqqa tózip-aq kelipti. Ony ózderi de jasyrmaı aıtady. – Men 1955 jyldan beri Peshnoı aýy­lynda turamyn, – deıdi Atyraý qalasynan jańa páterge ıe bolǵan 69 jastaǵy qarııa Rızýan Qaıyrlıev. –Aýyldaǵy qıyndyq janyma batqasyn, oblys ákimi Bergeı Rysqalıevtiń qabyldaýyna bardym. О́zim bolmasam da, balalarym qaladaǵy jaıly turmysty kórse degen ótinishimdi aıttym. Ákim aýyldy Atyraý qalasyna kóshirýge bergen ýádesinde turdy. Mine, búgin men de, ózge aýyldastarym da jańa baspanaǵa ıe bolyp, kóshimizdi qalaǵa burdyq. Endi burynǵy qıyndyqtarymyz kórgen tústeı bolmaq. Elimiz táýelsizdik almaǵanda, ekonomıkamyz órkendemegende, burynǵysha qıyndyqpen kún kóre beretin edik. Táýbe deıik, aıdaladaǵy aýyldan qalaǵa qonys­tanýymyz – táýelsizdiktiń  jemisi! Peshnoıdy uzaq meken etken turǵyn­darǵa Atyraý qalasyndaǵy «Nursaıa» shaǵyn aýdanynan paıdalanýǵa berilgen jańa úıden baspana berildi. Sóıtip, olar aldaǵy qysty turmysqa jaıly, «kógildir otyny» men jylýy, sýy men elektr jaryǵy múlde úzilmeıtin jańa páterlerde qarsy alatyn boldy. Aıtqandaı, jańa baspanaǵa Balyq­shy kentindegi apatty úıde turatyn tur­ǵyndar da ıe boldy. Qonys toıyn toılaýshylarǵa páter kiltterin tabystaǵan oblys ákimi Bergeı Rysqalıevtyń aıtýyna qaraǵanda, Atyraý qalasynda 50-ge jýyq apatty úı esepke alynǵan. Bul úılerde turatyn otbasylardyń barlyǵyn jyl aıaǵyna deıin jańa turǵyn úılerge kóshirý kózdelip otyr. – Búgin jańa qonysqa 60  otbasy qonystandy, –dedi oblys ákimi. – Olardyń arasynda medısına qyzmetkerleri de bar. Endi jyl aıaǵyna deıin taǵy da 1200 páterli turǵyn úıler turǵyndar ıgiligi úshin paıdalanýǵa tapsyrylady. Osylaısha, Táýelsizdik toıy qarsańynda munaıly óńirde balabaqsha tabaldyryǵyn attaǵan balaqaılar da, qonys toıyn toı­laǵan úlkender de sheksiz qýanyshqa keneldi. Joldasbek ShО́PEǴUL, Atyraý oblysy.