Memlekettik grant – jaǵdaıy tómen otbasydan shyqqan jastar úshin úlken múmkindik, onsyz olardyń ómiri múldem basqa bolmaq. Bir sıyr men zeınetaqyǵa qarap otyrǵan januıanyń balasyn Almatydaǵy QazUÝ-da nemese Astanadaǵy EUÝ-de aqyly oqytýǵa áste shamasy jetpes. Úlken qalada oqý aqysyn tólemek túgil jatatyn jeriń men kúndelikti tamaǵyńdy tabýdyń ózi ońaıǵa soqpaıdy. Osy memlekettik granttyń arqasynda qanshama aýyl balasy qala kórip, elimizdiń túkpir-túkpirinen kelgen qurdastarymen aralasyp, jańa ómir bastaýda. Bireýi oqýdy sátti aıaqtap, bilikti maman atansa, bireýi kásip ashyp, bireýi ǵylym jolyna túsýde. Ras, aýylǵa qaıtyp jatqany da bar. Munyń da jaqsy jaqtary joq emes. Tórt jyl qalada júrip, bilim jınap, ómirge kózqarasy ózgergen, tehnologııany meńgergen jas týǵan jerine barsa, aýyl óńirine oń ózgeris ákeledi. Sondyqtan, eger tańdaý grant nemese aýylda qalý bolsa, men birinshisine daýys berer edim.
Degenmen, bir nárseni este ustaý kerek. «Grant úshin kez kelgen mamandyqty tańdaımyn» degen ustanym árdaıym durys sheshim bola bermeıdi. Mektep oqýshylarymen sóıleskende, fızıkany nemese bıologııany tańdadym, sebebi ol boıynsha grant kóp dep jıi aıtady. Bul pánder ózińe qyzyq pa desem, «joq» dep jaýap beredi. Balalardyń nıeti durys, ata-anaǵa salmaq salmaıyn deıdi. Alaıda, tańdaǵan mamandyǵyńa qyzyqpasań, túsinbeseń, bolashaǵyńdy kórmeseń, memlekettik grant máseleni tek tórt jyl keıinge qaldyrady. Dıplom alǵan soń, ary qaraı ne isteımin degen suraq qaıta týady. Sóıtip, tórt jyl oqyǵanym beker ketpesin dep, unatpasa da dıplomy boıynsha jumysqa kirip, súıretilip júredi. Sabaqty jaqsy oqyp, ýnıversıtet basshylyǵynyń kózine túskender magıstratýraǵa túsip, máseleni taǵy eki jylǵa shegerip jatady. Biraq álgi suraq taǵy shyǵady.
Osyǵan oraı ata-analarǵa aıtarym, shamalaryńyz kelgenshe, balańyzǵa unaıtyn mamandyǵyna oqýǵa múmkindik berińiz, sapaly ýnıversıtet tańdańyz. Qazir bálkim qınalarsyz, biraq keıin jemisin beredi. Júrek qalaýymen tańdaǵan mamandyq úshin siz tórt jyl qınalasyz, al májbúrlikpen tańdaǵan mamandyq úshin balańyz ómir boıy qınalýy múmkin.
UBT-dan tómen ball alý árdaıym balanyń bilimi tómen ekenin bildire bermeıdi. Balańyz tyǵyltaıań sátte qatty qobaljyp oıyn jınaı almaýy múmkin. UBT-dan az jınap, biraq oılaý qabileti damyǵan, bilimi tereń stýdentterdi kóp kórdim. Aqyly bólimge túsip, tabandylyǵynyń arqasynda grantqa aýysyp, keıin stýdent bola tura jumysqa turyp, o bastan grantta oqyǵan kýrstastarynan ozyp shyqqandar da bar.
Ne kóp, zańger men qarjyger kóp, odan da tehnıkalyq mamandyq tańdaǵan durys dep oılaý da keıde qatelikke ákelip jatady. Másele atalǵan mamandyqty tańdaıtyndardyń kóptiginde emes, másele básekege daıyn bola bilýde. Zańgerler myń bolsyn, mıllıon bolsyn mańyzdy emes. Sabaqty óte jaqsy oqyp, mamandyqty meńgerseńiz, zaman talaptaryna saı bolsańyz, kóptiń ishinen erekshelenýge bolady. О́mirde paradoks jaǵdaılar kóp kezdesedi. Solardyń biri osy zań mamandarynyń kóptigine qatysty. Bir jaǵynan zańgerler qaptap ketti deımiz, ekinshi jaǵynan aǵylshyn tilin erkin qoldanatyn, halyqaralyq zańnamany biletin, tájirıbesi bar zań mamandaryn taba almaı júrgenderdi jıi kóremiz.
Talapkerler men stýdentterge aıtarym, eger ata-anańyz qınalsa da, oqýdyń aqysyn tólep, tapqan-taıanǵanyn sizderge berip otyrsa, onyń qadirin bilip, berilgen 4 jyldyq ýaqytty meılinshe uqypty jumsaý qajet. Kitap oqýdan kóz ashpaı, úırenýden jalyqpaı, bos ýaqytty bilim jınaýmen ótkizseńiz, ata-ana úmitin de, memleket úmitin de aqtaısyz jáne ómirde jetistikke jetesiz. Úzdik bolýǵa, kásibı shyńdalýǵa umtylý qajet.