Mamandardyń málimetinshe, halyqaralyq sharanyń saltanatty ashylýynan beri kórermenderdiń jalpy sany shamamen 1 mıllıon 200 myńdy quraǵan. EKSPO-nyń barlyq nysandarynyń kelýshilerin eseptesek, ótken aptada 8 mıllıon 890 myń adam pavılondarǵa kirip-shyqqan.
Tanymal pavılondardyń qataryn Efıopııa, IýAR, Madagaskar, Kenııa, Serra-Leone sekildi 21 memleketten turatyn Afrıka plaza bastap tur. Aıta keterligi, munda taban tiregen qonaqtar afrıkalyqtarmen fotoǵa túsýge tyrysady. Tipti sol úshin uzyn-sonar kezekter paıda bolǵan. Sýretke túsýshilerdiń kóptigi sonsha, keıbir memleketter fotoǵa túskeni úshin aıyppul salynatyny týraly habarlamalar da ilip qoıǵan. Birqatar elder fotoǵa túsýge tyıym salsa da, Ganadan kelgen Ankoma Boateng qazaqstandyqtardyń ótinishin eleýsiz qaldyrǵan emes. «Fotoǵa túsý de ońaı emes eken, sharshaımyz. Degenmen, bul jaqtaǵy adamdar biz sııaqty qara násildi azamattardy kóp kórmeıdi. Ony da jaqsy túsinemiz. Fotoǵa túsýdiń ózi adamdar arasynda baılanys ornatýǵa sebep bolady», degen ol buryn Batys Afrıkanyń turǵyndary da basqa adamdarǵa tańyrqap qaraıtynyn jetkizdi. Qazirgi kezde ábden úırengen kórinedi.
Aptadaǵy tanymaldardyń tizimin Mysyr pavılony jalǵaıdy. Úshinshi orynda Reseı, sodan keıin Túrkııa, Japonııa pavılondary bestikti toltyryp tur. Altynshy orynda Úndistan pavılony bolsa, rettik sanmen Saýd Arabııasy, О́zbekstan, Taıland pavılondary ornalasqan. Ondyqty Malaızııa men Germanııa pavılondary aıaqtapty.
Medıa ortalyqtyń habarlaýynsha, ótken aptada kórme aýmaǵynda 169 oqıǵa tirkeldi. Olardyń kópshiligi joǵalǵan balalardy izdeýge, qoǵamdyq tártipti buzýǵa jáne spırtti ishimdik ishýge baılanysty bolǵan. Al qaýipsizdik qyzmetkerleri, ásirese, balalarǵa abaı bolýdy eskertedi.
Ashat Raıqul,
"Egemen Qazaqstan"
Sýretti túsirgen Orynbaı Balmurat,
"Egemen Qazaqstan"