Sharaǵa belgili dırıjer Alan Bóribaev, Mádenıet jáne sport vıse-mınıstri Aqtoty Raıymqulova, Italııanyń Genýıa qalasyndaǵy «Karlo Felıche» teatrynyń kórkemdik jetekshisi Djýzeppe Akýavıva, «Astana Opera» MOBT dırektory Ǵalym Ahmedıarov jáne «Astana Opera» dırektorynyń birinshi orynbasary Tóleýbek Álpıev qatysty.
Alqaly jıynda alǵysózdi alǵan Aqtoty Raıymqulova jahandyq kórmeniń mańyzdylyǵy men mınıstrlik tarapynan júzege asyrylyp jatqan birqatar mádenı sharalar týraly aıtyp ótti.
– Jahandyq kórme kezinde Mádenıet jáne sport mınıstrligi Qazaqstannyń oryndaýshylyq ónerin álemge tanytatyn tyń jobalar ázirleýdi maqsat etti. Mine, osy jospar aıasynda Alan Bóribaevpen aqyldasa kele Gýstav Malerdiń «№8 Sımfonııasyn» oryndaýdy jón kórdik, – dedi Aqtoty Raıymqulova.
Álemdik mýzykada Gýstav Malerdiń «№8 Sımfonııasy» eń belgili shyǵarmalardyń biri retinde moıyndalǵan. Al ony óz dárejesinde oryndaý úshin mýzykanttar sany da aıtarlyqtaı kóp bolýy qajet. Uıymdastyrýshylardyń aıtýynsha bul jobaǵa barlyǵy 1200 mýzykant atsalysqan. Onyń 99%-y – qazaqstandyqtar. Mundaı ǵalamat týyndyny «Astana Operanyń» sımfonııalyq orkestri, hory jáne balalar hory, Italııanyń eń ataqty «Karlo Felıche» teatrynyń, Abaı atyndaǵy Memlekettik akademııalyq opera jáne balet teatrynyń orkestri men hory, Qazaqstan Respýblıkasy Memleketik akademııalyq sımfonııalyq orkestri men «Solıster akademııasy» Memlekettik kameralyq orkestri, sondaı-aq, elimizdegi ózge de jetekshi hor ujymdary qatysty.
Mundaı kólemdi konsert osyǵan deıin eshbir jerde bolmaǵanyn da erekshe atap ótken jón. Iаǵnı, aýqymdylyǵy jaǵynan álemdik rekord ornatyldy dep te aıtýǵa bolady. Sonymen qatar, bul keshke Gollıvýdtyń ataqty akteri, «Oskar» syılyǵynyń laýreaty Edrıen Broýdı arnaıy qatysty.
– Bul jobanyń júzege asýyna Mádenıet jáne sport mınıstri Arystanbek Muhamedıuly sebepshi boldy. Ol ózi de kásibı mýzykant, birneshe ret sımfonııalyq shyǵarmalardy oryndaǵan. Al endi Malerdiń sımfonııasyna toqtalar bolsam, ony tyńdaý sondaı jeńil bolǵanmen, oryndaý óte aýyr. Qyzyqty bir málimet keltire keteıin, bul shyǵarma alǵash ret oryndalǵan kezde 1910 jyldyń qyrkúıegi, ıaǵnı Eýropada EKSPO kórmesi ótip jatqan kez bolypty. Al endi mundaı asa iri jobany júzege asyrý – kez kelgen ujym úshin úlken syn. Daıyndyq kezinde ózimniń tipti, pedagogıkalyq qabiletimdi de oıatqan sekildimin. Sebebi, 1200 mýzykanttyń ishinde jeti jasar baladan orta jastaǵy óner ıeleri de bar, – dedi Alan Bóribaev.
Al óz kezeginde ıtalııalyq maman Djýzeppe Akýavıva qazaq tilinde amandasyp, osyndaı aýqymdy sharaǵa shaqyrylǵany úshin Mádenıet jáne sport mınıstrligine alǵysyn bildirip, konserttiń mańyzdylyǵyn aıta ótti.
Baspasóz konferensııasynan keıin araǵa bir saǵat ýaqyt salyp áıgili kompozıtordyń týyndysy qoıyldy. Zalǵa jınalǵan turǵyndar sahna tolyǵymen ashylyp, 1200 mýzykant tolyǵymen kóringen sátte eriksiz tań qalyp, qoshemet bildirip jatty. Al bir jarym saǵatqa sozylǵan konsert aıaqtalǵannan keıin kórermender kesh taǵy da uzara tússe eken degen kúıde qaldy. Sharanyń óte joǵary deńgeıde ótkeni týraly senimmen aıtýǵa bolady. Sebebi, kórermenniń janaryndaǵy alǵysyn ystyq yqylasyn birden baıqaýǵa bolady.
Al akter Edrıen Broýdı bul keshten alǵan áserin bylaısha bólisken eken.
– Alan Bóribaevtyń dırıjerligimen 1200 mýzykant oryndaǵan bul shyǵarmanyń keremetin sózben aıtyp jetkize almaımyn. Buryn-sońdy mundaı áserge bólenbegen edim. Mundaı ǵajaıypty esh jerden kórgen emespin. Alan Bóribaevtyń shabyt syılaǵany sonshalyq, aldaǵy ýaqytta dırıjerdiń rólin somdaımyn dep ishteı bekindim, – deıdi akter.
О́ner ıesi úshin halyqtyń súıispenshiliginen asqan qandaı baqyt bar?! Tyńdarmannyń alǵysyn alsa, shyn baǵasy sol emes pe?!
Aıan ÁBDÝÁLI, «Egemen Qazaqstan»