Jyl basynan beri Astanada belgilenbegen oryndarda saýdamen aınalysý boıynsha 1600 ákimshilik quqyq buzýshylyq anyqtalǵan. Jalpy somasy 1 508 885 teńgege aıyppul salyndy.
Ákimshilik Kodekstiń «Belgilenbegen oryndarda saýda jasaý» 204 babyna saı eskertý nemese 5 AEK (11 345 teńge) aıyppul qarastyrylǵan. Bir jyl ishinde qaıta zań buzsa, 10 AEK(22 690 teńge) aıyppul salynady. Eger quqyq buzýshylyq júıeli túrde qaıtalansa, zańsyz saýda júrgizgen kásipkerdiń pavılıony tárkilenedi. Jyl basynan beri 60 saýda orny alynyp tastalǵan, al jyl sońyna deıin taǵy 100 núkte joıylmaq.
О́z kezeginde elordalyq kásipkerlerge dala saýdasy úshin 1000 oryn bólingen. Bul baǵdarlamanyń operatory «Astana áleýmettik – kásipkerlik korporasııasy ulttyq kompanııa» AQ borlyp tabylady. Oryndardy anyqtaý úshin quramyna memlekettik organ ókilderi, atap aıtsaq, kásipkerler palatasy jáne ózge de quzyrly mekemelerden kirgen arnaıy komıssııa quryldy.
Budan bólek, arnaıy maqsatta paıdalanýǵa arnalǵan oryndar tizimi, nysannyń syrtqy kelbetine qoıylatyn talap, stasıonarlyq nysan nemese mobıldi qondyrǵy ekeni anyqtalyp, kelisildi.
«Kóshe saýdasyna arnalǵan 1000 oryn» baǵdarlamasyna sáıkes saýda-sattyq júrgizýge ruqsat alǵan kásipkerler saýdasyn zańsyz júzege asyratyndardan sary tústi arnaıy formamen erekshelenedi. Onymen birge kásipkerde kelesi qujattar bolýy kerek: «Astana áleýmettik-kásipkerlik korporasııasy» UK» AQ-men jasalǵan kelisimshart nemese sýbjalǵa alý kelisimsharty. Jazǵy ýaqytta azyq-túlik ónimderi men zattardyń kelesi túri suranysqa ıe: balmuzdaq, tátti sýsyndar, kókónis-jemister, kúnnen qorǵaıtyn kózildirik jáne t.b. zattar. Qala turǵyndary men qonaqtary zańsyz saýda-sattyq jaǵdaıyna tap bolǵan jaǵdaıda 109 nómirine habarlasýlaryna bolady.
- Azamattar tıisti ruqsat qujattarynsyz ózderi dúńgeshikterdi qoıyp alady. Qoldanystaǵy jáne qolda bar ákimshilik resýrstar aıtarlyqtaı nátıje bermeıdi, sol sebepten azamat aıyppuldy tóleıdi nemese oǵan eskertý jasalady. Sondyqtan da biz zańsyz saýdaǵa tosqaýyl qoıý maqsatynda buzýshylyqtar oryn alǵan jaǵdaıda, zańsyz ýchaskelerdi anyqtaǵan jaǵdaıda qala turǵyndary men qonaqtaryna joǵaryda kórsetilgen telefon nómirine habarlasýyn suraımyz, - dedi Astana q. IID jergilikti polısııa qyzmeti basshysynyń orynbasary Gosman Jakın.
Astana q. IID JPQ buzýshylyqtardy anyqtaý maqsatynda jıi reıd uıymdastyryp turady. Buzýshylyqtar, atap aıtqanda zańsyz saýda-sattyq «Nurly Jol» jasyl jelekjoly, Báıterek monýmentiniń aldy, Esil ózeniniń jaǵalaýy, Respýblıka dańǵyldary boıynsha jıi kezdesedi.