Qazaqstan Respýblıkasynyń energetıka vıse-mınıstri Baqytjan Jaqsalıev Atomdyq energııany beıbit maqsatta qoldaný boıynsha komıssııasynyń músheleri aldynda sóz sóıledi. Otyrysty Komıssııanyń tóraǵasy, «Rosatom» atomdyq energııa boıynsha memlekettik korporasııanyń Halyqaralyq qyzmet blogynyń dırektory – bas dırektordyń orynbasary Nıkolaı Spasskıı ashqan bolatyn.
«Ýran shyǵaratyn óndiristerdiń yqpaly tıgen aýmaqtardyń rekýltıvasııasy» memleketaralyq maqsatty baǵdarlamasynyń júzege asyrylý barysy jaıynda Federaldy ıadrolyq jáne radıasııalyq qaýipsizdik ortalyǵynyń bas dırektory Andreı Golıneı baıandady. Komıssııa 2016 jyly Baǵdarlama aıasynda atqarylǵan jumys týraly esepti maquldady.
Qazaqstan Respýblıkasynyń Energetıka mınıstrliginiń Atomdyq energetıka jáne ónerkásip departamentiniń dırektory Batyrjan Qarakózov Qazaqstan aýmaǵyndaǵy qaldyqqoımalar nysandaryn Baǵdarlamaǵa qosý týraly bastamasyn alǵa tartty. Bul onyń júzege asyrylý nátıjesiniń eń úzdik dáleli.
Arnaıy otyrys nátıjesinde Qazaqstan aýmaǵyndaǵy qaldyqqoımalar nysandaryn Memleketaralyq maqsatty baǵdarlamaǵa qosý týraly Qazaqstan Respýblıkasynyń bastamasy maquldandy. Jýyq arada Baǵdarlamanyń Tapsyrys berýshi-Úılestirýshisi – «Rosatom» Memlekettik korporasııasy Qazaqstan Respýblıkasynyń Energetıka mınıstrligimen birge usynystardy ázirleýge kirisip, TMD Atqarýshy komıtetiniń talqylaýyna arnalǵan Baǵdarlamaǵa engiziletin ózgeristerdi daıyndaıdy.
Qyrǵyzstannyń tótenshe jaǵdaılar mınıstrligi janyndaǵy Qaldyqqoımalardy ustaý boıynsha agenttiginiń dırektory Damır Qushbaqov MAGATE jasap shyǵarǵan «Ortalyq Azııadaǵy ýran murasynyń rekýltıvasııasy» Strategııalyq sheberlik josparyn usyndy. Eýropalyq qaıta qurý jáne damý banki rekýltıvasııalyq jumystardy júrgizý úshin demeýshilerdiń qarjysyn jınaqtaıtyn arnaıy qordy ashqan.
Reseı mamandary basqa Respýblıkalarynyń ókilderimen birlesip Memleketaralyq maqsatty baǵdarlamanyń 1-nshi kezeńin júzege asyrý boıynsha jumystardy oryndap, bıyl fızıkalyq jumystarǵa kiristi.