Bul sapardyń basty maqsaty - Qazaqstan Respýblıkasy Prezıdenti Nursultan Ábishuly Nazarbaevtyń ótken jyly Polsha Respýblıkasyna jasaǵan saparyndaǵy kelisimderge oraı elaralyq yntymaqtastyqty damytý. Osy sapar barysynda óńiraralyq áriptestik baılanystardy odan ári nyǵaıtý týraly kelisimder jasaldy.
Delegasııa músheleri Lıýblın voevodtyǵynyń marshalegi (basshysy) Slavomır Sosnovskıımen kezdesip, Lıýblındegi aýrýhanada, balalar emhanasynda, Ekonomıka jáne ınnovasııa Joǵarǵy mektebinde, Bıala-Podlıaska qalasyndaǵy medısınalyq ortalyqta boldy.
Baǵdarlama barysyndaǵy sharalar nátıjesinde eki tarap Qazaqstannyń 35 stýdentin orta býyndy medısına qyzmetkerlerin eýropalyq baǵdarlamamen daıyndaý maqsatynda 3,5 jyl Lıýblın jáne Bıala-Podlıaska qalalaryndaǵy polıak ýnıversıtetterinde oqytý jóninde sheshimge keldi. Sonymen qatar ekonomıka, menedjment jáne ınformatıka boıynsha 30 mamandy oqytý týraly da kelisildi. Qazaqstandyqtardyń oqýy men Polshada turý shyǵyndarynyń barlyǵyn polıak jaǵy kóteretin bolady.
Lıýblın voevodtyǵynyń marshalegi bastaǵan polıak kásipkerleriniń bir toby bıylǵy jyldyń qyrkúıek aıynyń basynda Astanaǵa EKSPO-2017 kórmesine kelýdi josparlap otyr. О́z kezeginde qazaqstandyq delegasııanyń jetekshisi uzaq merzimdi óńiraralyq yntymaqtastyqty ornyqtyrý maqsatynda polıak ókilderin Almaty oblysyna saparlap kelýge shaqyrdy.
Sondaı-aq 2017 jylǵy 25 shildede Varshavada Qazaqstannyń Polshadaǵy Tótenshe jáne О́kiletti elshisi Marǵulan Baımuhan men Almaty oblysy ákiminiń orynbasary Jaqsylyq Omardyń Polsha damý vıse-mınıstri ári Qazaqstan-Polsha ekonomıkalyq yntymaqtastyǵy jónindegi úkimetaralyq komıssııanyń teń tóraǵasy Tadeýsh Kossınskıımen kezdesýi ótti. Kezdesýde qos tarap ózara qarym-qatynastyń óńiraralyq deńgeıi jónindegi máselelerdi talqylady.