Taldyqorǵandaǵy «Jastar» mádenı-demalys saıabaǵy men Qaratal jaǵalaýyn úlgi ete otyryp salynǵan Úsharaldaǵy jańa saıabaq kóz qýantady. Mamyr aıynda paıdalanýǵa berilgen demalys ornynyń aýmaǵy - 15,1 ga. Bólingen 103,6 mln. teńgege atalmysh saıabaqtyń jóndeý jáne abattandyrý jumystaryn «Alakól jylý» JShS sapaly júrgizgen. Alleıada sáýlettik músinder, Máńgilik el monýmenti qoıylǵan. Munda balalarǵa arnalǵan shaǵyn fýtbol jáne oıyn alańdary, velosıped joly, dene shynyqtyrýǵa arnalǵan qurylǵylar qarastyrylyp, sýburqaq, úlken qolshatyr úlgisimen sándetilip jabylǵan oryndyqtar ornatylǵan.
Oblys ákimi A. Batalov saıabaqta serýendep júrgen turǵyndarmen, oıyn alańyndaǵy balalarmen tildesti. Jańadan shańyraq kóterip jatqan jastarǵa saıabaq ishinde jolyǵyp, tilegin bildirip, aq jol tiledi.
Munan soń Alakól jaǵalaýyn damytýdyń egjeı-tegjeıli josparymen, kól jaǵalaýyn bekitý, avtokólik joldaryn qaıta jańǵyrtý, Aqshıde salynatyn temir jol vokzaly qurylysynyń jobalarymen, kól jaǵalaýynda týrımzdi damytý sharalarymen tanysty.
Oblys ákimi A. Batalov kól jaǵalaýyn bekitý jumystaryn júrgizbes buryn ǵylymı zertteý sharalaryn atqarý qajettigin aıtty. Jaǵalaýdyń qaı tusyn sý jıi shaıatynyn, tolqyn soqqysy qaı jerge kóp tıetinin, jalpy jaǵalaýdy bekitý barysynda nazarǵa alynýy tıis máselelerdi arnaıy ǵylymı mamandarmen birlese otyryp atqarýdy tapsyrdy. Sonymen qatar temir jol vokzalynyń qurylysyn tamyz aıynyń ortasynan keshiktireı bastaý qajettigin eskertti.
Sondaı-aq Aqshı aýylyndaǵy «AQUAMARINE resort», «Alakol resort» sııaqty qonaq úı keshenderin aralaý barysynda kól jaǵalaýyndaǵy týrızmdi damytý úshin eń aldymen qyzmet kórsetý sapasy joǵary, demalýshylarǵa barlyq qolaıly jaǵdaılar qarastyrylǵan qonaq úılerdiń mańyzy zor ekenin aıtty. Aýdan ákimi Álibek Jaqanbaevqa Alakól mańynda týrızmdi damytý sharalaryn úzdiksiz júrgizýdi tapsyrdy.