Aqtóbe oblysynyń jańa brendin daıyndaý jumysy eki aıǵa sozyldy. Memlekettik satyp alýdan soń jeńimpaz anyqtalyp, dızaınerler eki aı boıy óńir tarıhy men mádenıetin, salt-dástúrin aıqyndaıtyn erekshelikterdi iriktedi. Barys, kıik te logotıpke salynýy múmkin janýarlar sanatyna kirgen. Al qyzǵaldaqty Aqtóbeden buryn Shymkent óz brendine aınaldyrǵan.
«Halyqaralyq arenadaǵy ımıdjdi qalyptastyrý, tanymaldyǵyn arttyrý, aqtóbelikterdiń patrıotızmin nyǵaıtý maqsatynda Aqtóbe oblysynyń óńirlik brendi anyqtaldy. Brend daıyndaý kezinde saraptamalyq keńes qurylyp, oǵan sáýlet, dızaın, aqparattyq-kommýnıkasııalyq tehnologııa, marketıng salasynyń sarapshylary kirdi. Barlyǵy 45 nusqa jasaldy»,- dedi oblystyq máslıhat hatshysy, Saraptama keńesiniń tóraıymy Sánııa Qaldyǵulova.
Brend daıyndaý jumystary kezinde jergilikti turǵyndar arasynda saýalnama júgizildi.
«Basqa da óńirlerdiń tájirıbesi qarastyryldy. Ońtústik Qazaqstan oblysy, Astana, Almaty qalalary damyǵan elderdiń brendterin qarap, óz óńirimizge keletin algorıtm daıyndaldy. Halyq arasynda saýalnama júrgizildi. Tarıh, mádenıet, salt-dástúr men oblys ereksheligi eskerildi. Úshinshi kezeńde ınternet arqyly daýys berildi. Áleýmettik jeli paıdalanyldy»,- dedi Aqtóbe oblystyq syrtqy baılanystar jáne týrızm basqarmasynyń basshysy Ermek Kenjehanuly.
Sary, qyzǵylt sary, qyzyl. Úsh tús tańdalyp, A áripi beınelengen logotıp endi Aqtóbeniń brendi bolady.
«Brend qarapaıym ári erekshe bolýy kerek. Aqtóbeniń logotıpinde A árpi beınelengen. Árip qoshqar múıiz oıýymen ushtastyryldy. Ashyq úsh tús tańdaldy. Qyzyl, qyzǵylt sary men sary. Bul úsh tús óńir turǵyndarynyń salt-dástúrin, minezi men batyldyǵyn aıqyndaıdy. Sonymen qatar, «Aqtóbe - qutty meken» jazýy qalady. Endigi jumys - brendti tanymal etý», dedi dızaıner Ǵasyrjan Omarbaev.