Birde bala kezinde ol sorǵa qulap, batyp bara jatqan ǵoı. Sonda sol mańda júrgen bir fermer onyń jan ushyra «kómektesińder» dep aıqaılaǵynyn estip, ajaldan qutqaryp qalypty. Fermerdiń osy qaıyrymdylyq, adamgershilik áreketiniń qaıtarymy retinde Cherchılldiń ákesi endi onyń ulyn Londonda oqytýdy moınyna alady. Álgi fermerdiń uly oqýdan oqýdy úzdik bitirip, aqyry, talaılardyń ómirin qutqaryp qalatyn dári – penısıllındi oılap tabady. Dál osy dári tabylǵan kezde aýyr ókpe dertine shaldyqqan jas jigit Ý. Cherchıll aýrýhanaǵa túsken eken. Qudaıdyń qudyreti, ony sol kezde álgi fermerdiń uly, ataqty dáriger Aleksandr Flemmıngtiń penısıllın dárisi ajaldan arashalap qalady. Keıin Ýınston Cherchıll Ulybrıtanııanyń premer-mınıstri bolǵany belgili. Sol kezde onyń óz ómirinen alynyp aıtylǵan joǵarydaǵy naqyl sózi keńinen tarap ketken. О́ıtkeni rasy solaı, jaqsylyq jasasań da, jamandyq jasasań da ózińe tıedi.
Al negizinen jaqsy adam ǵana jaqsylyq jasaı alady degen sóz bar. Bizdiń halqymyz bireýge jaqsylyq jasasań, ol kúnderdiń kúni Allanyń qudiretimen ózińe, bala-shaǵańa eki ese jaqsylyq bolyp qaıta oralatynyn burynnan bilgen. Sondyqtan ata-babalarymyz obal, saýapty qatar qoıyp, jaqsylyqtyń da, jamandyqtyń da áıteýir bir qaıta aınalyp soǵaryn únemi este ustaǵan. Álimsaqtan paıda bolǵan mundaı asyl qasıet halqymyzdyń boıynan talaı márte kórinis tapty da. Bárin aıtpaǵanda, sonaý bir qıyn-qystaý kezeńde, asharshylyq jaılaǵan shaqta, dúnıe júzi alapat soǵystyń sharpýyna shyrmalǵanda jer aýdarylyp kelgen talaı ózge ulttardyń ókilderimen qazaq halqy bir tilim nanyn bólise jedi. Qanǵa sińgen keńdik pen márttik halqymyzdyń óshpes rýhyn, erligin pash etti. Halqymyzdyń osyndaı tamasha asyl isterinen búgingi urpaq alar ónege de kóp. Osyǵan oraı Elbasy da «Bolashaqqa baǵdar: rýhanı jańǵyrý» maqalasynda: «Men halqymnyń taǵylymy mol tarıhy men yqylym zamannan arqaýy úzilmegen ulttyq salt-dástúrlerin aldaǵy órkendeýdiń berik dińi ete otyryp, árbir qadamyn nyq basýyn, bolashaqqa senimmen bet alýyn qalaımyn», dedi.
Tipti halyq arasynda aıtylatyn tárbıeli áńgimelerdiń óz shyndyǵy bar. Sonyń birin mysalǵa alsaq, bir áıel kúnde eki taba nan pisirip, bireýin ózi talǵajaý etip, bireýin terezesiniń syrtyna qoıady eken. Ondaǵysy kópten xabar-osharsyz ketken balasynyń aman kelýin tileý amaly kórinedi. Onyń nanyn aıaǵyn siltip basatyn qańǵybas qart kisi alyp júrgen. Ol nandy alyp bara jatyp «Jamandyq qylsań ózińe, jaqsylyq qylsań ózińe!» dep ketetin bolǵan. Qańǵybas alǵystan góri, qarǵys aıtatyndaı áser qaldyrady. Sodan áıel dándegen qańǵybastan ońaılyqpen qutylmasyn bilip, ashýlanyp, sol kúngi taba nanǵa ý qosady. Biraq jeme-jemge kelgende ol raıynan qaıtyp, jańa taza nan pisirip qoıady. Burynǵysha tanys qart kelip alyp ketedi. Dál sol kúni keshte bireý áıeldiń esigin qaǵady. Ashsa, joǵalyp ketken uly! «Anashym, men seni eshqashan kórmeımin dep oılap edim! Jumys izdep basqa qalaǵa barǵanymmen, jolym bolmady. Aqyry elge oralǵanda bireýler aıaýsyz uryp, tonap ketti. Es-tússiz jatqan jerimde aıaǵyn siltip basatyn qańǵybas qart kisi taýyp alyp, men es jıǵansha kúnde tamaqtandyryp júrdi. Kúnine bir taba nan ákelip, ekige bólip, jartysyn maǵan, jartysyn ózi jeıtin», deıdi uly. Muny estigende, áıeldiń kózi qaraýytyp, basy aınalyp ketedi. Búgin ǵana nıetinen jańylyp, shalǵa ýlanǵan nan bergisi keldi emes pe... Onda ulyn da óz qolymen óltiredi eken-aý...
«Qanymyzǵa sińgen kóptegen daǵdylar men taptaýryn bolǵan qasań qaǵıdalardy ózgertpeıinshe, bizdiń tolyqqandy jańǵyrýymyz múmkin emes. Tól tarıhymyzǵa, babalarymyzdyń ómir saltyna bir sát úńilip kórsek, shynaıy pragmatızmniń talaı jarqyn úlgilerin tabýǵa bolady…Biz «Janyńda júr jaqsy adam» degen sózdiń baıybyna bara bermeımiz», dedi Elbasy. «Jaqsy adam ǵana jaqsy basshy bola alady» dep J.Balasaǵun aıtqandaı, jaqsy adam ǵana jurtqa jaqsylyq jasap, elimizdi ushpaqqa jetkize alady. Sondyqtan qashanda aınalamyzǵa jaqsylyq qana jasaýymyz qajet. О́ıtkeni, ol ózimizge aınalyp soǵatyny sózsiz.
Aleksandr TASBOLATOV «Egemen Qazaqstan»