Iаdrolyq arsenaldan ótken ǵasyrdyń orta tusynda bas tartqan Kosta-Rıka búgingi Qazaqstannyń ıadrolyq qarýsyzdaný bastamasyn qoldaıdy. Eki el arasyndaǵy dıplomatııalyq qarym-qatynas 1996 jyly ornaǵan. Qazirgi tańda qos tarap san salada yntymaqtastyqty keńeıtýge múddeli. Ásirese, medısınalyq týrızm boıynsha baılanysty bekemdeı túspek.
«Latyn Amerıkasyndaǵy jasyl energııanyń úlesi 90 paıyz bolady. Munda kún jáne sýdan qýat alatyn álemdegi eń iri kásiporyndar ornalasqan. Bul oraıda, Kosta-Rıka da qalyspaıdy. Biz kún, jel, bıomassa, geotermaldy jáne gıdro energııalaryn óndiremiz. Halyqaralyq energetıkalyq agenttiktiń málimetterine súıensek, 2014 jyly jańartylatyn energııanyń úlesi álem boıynsha 22,3 paıyzdy qurady. Al, bizdiń eldegi bul kórsetkish 100 paıyzǵa jýyqtady», dedi sharanyń resmı bóliminde eldiń syrtqy saıasat boıynsha bas dırektory Krıstıan Fernandes.
Amerıkanyń ortalyq bóliginde ornalasqan Tynyq muhıty eliniń ókili Kosta-Rıkanyń qorshaǵan ortaǵa uqyptylyqpen qaraıtynyn, ádemi ári demokratııalyq memleket ekenin jetkizdi. «Ondaǵy ekotýrızmniń damýy Ortalyq Azııa elderi, sonyń ishinde Qazaqstan úshin de úlken qyzyǵýshylyq jáne áleýet týǵyzýy múmkin. Biz qazaq jurtynan Kosta-Rıkaǵa týrısterdiń kóbirek kelgenin qalaımyz», dedi ol. K.Fernandes EKSPO-2017 kórmesine qatysý eli úshin úlken qurmet ekenin de atap ótti.
Qazaqstan tarapynan sóz sóılegen Densaýlyq saqtaý vıse-mınıstri Lázzat Aqtaeva eki el arasyndaǵy mindetti medısınalyq saqtandyrý salasyndaǵy yntymaqtastyq týraly áńgimeledi. «Ulttyq kúndi atap ótý qatysýshylarǵa ulttyq mádenıettiń, ómir salty men dástúrdiń úzdik úlgilerin kórsetýge múmkindik beredi. Qazaqstan Kosta-Rıkamen saıası, ekonomıkalyq, ǵylymı-tehnıkalyq, mádenı salalarda ǵana emes, sonymen qatar densaýlyq saqtaý salasynda, atap aıtqanda, mindetti áleýmettik medısınalyq saqtandyrý, medısınalyq týrızm máseleleri jáne basqa da baǵyttar boıynsha da qarym-qatynasty tereńdetý men keńeıtýge múddeli», dedi vıse-mınıstr.
Sharanyń resmı bóliginen keıin qazaqstandyq kórermender belgili saksofonshy, esimi Gınnestiń rekordtar kitabyna engen Djovannı Eskalanteniń ónerin tamashalady.