Jalpy, ótken jyly eski kólikterdi óńdeý boıynsha memlekettik baǵdarlama qabyldanyp, osynyń aıasynda tozǵan kólikter men olardyń qosalqy bólshekterin jınaqtaý iske asyrylyp kele jatqan bolatyn. Búginde elimizde kólik qaldyqtaryn jınaıtyn 17 pýnkt ashylǵan. Jınaqtalǵan osy kólikter endi Qaraǵandyǵa jetkizilip, óńdeýden ótetin bolady.
Qaraǵandynyń «Saryarqa» arnaıy ekonomıkalyq aımaǵynda salynǵan zaýyttyń ázirge birinshi kezeńi iske qosyldy. Jalpy quny 3 mıllıard 400 mıllıon teńgeni qamtıtyn zaýyt qurylysyn tolyq aıaqtaý ústimizdegi jyldyń jeltoqsan aıyna josparlanǵan. Negizinen bul joba 2015-2019 jyldarǵa arnalǵan ındýstrıaldy-ınnovasııalyq damý memlekettik baǵdarlamasy aıasynda júzege asyp otyr. Saltanatty sharaǵa Qaraǵandy oblysynyń ákimi Erlan Qoshanov, QR Investısııa jáne damý birinshi vıse-mınıstri Alık Aıdarbaev, QR Energetıka vıse-mınıstri Ǵanı Sádibekov jáne otandyq avtoóndirýshiler men ekologııalyq uıym ókilderi qatysty. A.Aıdarbaev óz sózinde jobanyń mańyzdylyǵyna toqtalyp, eńbek ónimdiligin arttyrý men óńdelgen taýar eksportynyń kólemin ulǵaıtýǵa baǵyttalǵan óńdeý ónerkásibiniń básekege qabiletiligin yntalandyrýǵa basa nazar aýdarý kerektigin eske saldy. Onyń aıtýynsha, mundaı jobalar memleket tarapynan tolyq qoldaýǵa ıe. Máselen, naqty jobalardyń ınfraqurylymy, uzaq merzimdi lızıng pen nesıeleý, jobalaý kompanııalarynyń jarǵylyq kapıtalyna kirý syndy nebir túrleri men tásilderi usynylady.
Búgingi tańda óz jumysyn bastaǵan atalmysh zaýyttyń ázirge Ortalyq Azııada teńdesi joq. Sondaı-aq, Qazaqstannyń qaıta óńdeý salasyndaǵy iri jobalardyń biri bolyp sanalady. Zaýyttyń dırektory Alekandr Rıabın myrzanyń aıtýynsha, jobanyń ekinshi kezeńi aıasynda pırrolızdeý qurylǵylaryn ornatyp, óńdeý múmkindigi 98 paıyzǵa jetkizilmek. Eski avtokólikterdi qaıta óńdeıtin zaýyt qazirgi ýaqytta jetpisten astam adamdy jumyspen qamtyp otyr. Jobany iske asyrýǵa jergilikti bılik te jan-jaqty qoldaý bildirýde. Aımaq basshysy Erlan Qoshanov aıtyp ótkendeı, elimizde búgingi tańda 5 mıllıonnan artyq kólik bolatyn bolsa, sonyń úshten biri jaramsyz bolyp tabylady. – Al, olardyń qorshaǵan ortaǵa tıgizetin zııandy áseri buǵan deıin kezek kúttirmes másele bolatyn. Sol turǵydan onyń sheshý jolynyń biri búgingi biz ashyp otyrǵan zaýyt dep esepteımiz. О́ndiristiń «Saryarqa» arnaıy ekonomıkalyq aımaǵynda qurylǵandyǵy da bizdi qatty qýantady. Bul joba halyqtyń densaýlyǵyn saqtaýǵa jáne qorshaǵan ortany qorǵaýǵa, qaldyqtardyń keri áser etýin qysqartý men aldyn alýǵa baǵyttalǵan, – dedi ákim.
Jańa zaýyt ındýstrııa 4.0 jáne sıfrlandyrý talaptaryna jaýap beretin zamanaýı ıtalııalyq qondyrǵylarmen jabdyqtalǵan. Keshenniń barlyq jumysyn kompıýterlik júıe baqylaıdy.
Italııanyń «Bonfiglioli» óndirýshisi shyǵarǵan shrederlik bul qurylǵylardyń qýaty jylyna 50 myń eski kólikti joıýǵa jetedi. Saǵatyna 20 avtokólikti metalǵa aınaldyryp, qaıta óńdeı alady. Al, ekinshi kezeń boıynsha qaldyqtan alynǵan tústi jáne qara metall qorytpasy aımaqtaǵy mys qorytý kásipornyna jetkizilmek. Osylaısha, ekonomıkanyń ózara baılanysty salalary arasynda mýltıplıkatıvti yqpal arta túsedi degen senim bar.
Dál osyndaı zamanaýı qurylǵyny búgingi tańda AQSh, Italııa jáne eýropanyń basqa da elderinde keńinen qoldanady eken.
Saltanatty shara barysynda sondaı-aq, eski kólikterdi joıýǵa ótkizip, jańa kólik satyp alýǵa jeńildikter beretin sertıfıkattar jaıly aıtyldy. QR energetıka mınıstrligi qarastyrǵan tıisti kvota boıynsha, eski jeńil avtokólik úshin О́KM operatorlary 315 myń teńgelik sertıfıkat usynady. Búginge deıin eski kólikterdi joıýǵa ótkizip, jańa kólik satyp alýǵa sertıfıkat beretin Baǵdarlama boıynsha 28284 avtokólik qabyldanǵan. Tozǵan tulpardy tıisti orynǵa tapsyrýda ázirge Qostanaı qalasy alda turǵan kórinedi. Baǵdarlama talaby boıynsha kez kelgen azamat eki sertıfıkatty biriktirip, tańdaǵan sanatyndaǵy kólik quralyn satyp alýǵa bolady.
Mıras ASAN, «Egemen Qazaqstan»
Qaraǵandy oblysy