Eske sala ketsek, «Alıýmınstroı» shaǵyn aýdanyndaǵy eki qabatty úıler Pavlodardaǵy alıýmınıı zaýytynyń qyzmetkerleri úshin salynǵan. 60 jyldyq tarıhy bar nysandar ábden eskirip, qıraýǵa shaq qaldy. Atalmysh turǵyn úı kesheniniń aýmaǵynda osylaısha árqaısysy 8 páterden 159 úı boı kóterdi. Shaǵyn aýdandaǵy 1272 páterde 4 myńǵa jýyq azamat turady. Olardyń keıbireýleri adam turýǵa jaramsyz. Sondyqtan, birneshe jyl buryn eski úıler súrile bastady. Al olardyń ornynda «Saryarqa» dep atalǵan jańa shaǵyn aýdan salyna bastady. Turǵyndardyń máselesin ońtaıly sheshý jumystary «Nurly jer» baǵdarlamasy aıasynda jandana tústi. Pavlodar qalalyq qurylys basqarmasynyń málimetinshe, jańa shaǵyn aýdanda 9 qabatty 40 úı salynady. 4200 páter halyq ıgiligine beriledi.
«Bıylǵy jyly jalpy aýmaǵy 26,2 myń sharshy metrdi quraıtyn turǵyn úılerdiń qurylysy jalǵasyn tabady. Páter sany – 374. Jalpy, oblys ortalyǵynda bir jylda kem degende 10 úıdiń qurylysy júrgiziledi», - deıdi Pavlodar oblystyq qurylys, jolaýshylar kóligi jáne avtomobıl joldary basqarmasy basshysynyń mindetin atqarýshy Rústem Raıysov.
Jańa aýdanda balabaqshalar, halyqqa qyzmet kórsetý jáne áleýmettik-mádenı nysandar salynady.
«Qazirgi ýaqytta 8 úı salyndy. Kezekte taǵy 4 úı bar. 2020 jylǵa qaraı «Saryarqa» shaǵyn aýdanynda 40 nysan boı kóteredi. Qurylys barysynda modeldeý men úılerdi salý kezinde ınnovasııalyq tehnologııalar qoldanylady», - deıdi Pavlodar oblysy ákiminiń birinshi orynbasary Dúısenbaı Turǵanov.
Aıta keteıik, búgingi kúnge deıin bul shaǵyn aýdanda 583 páter qoldanysqa berildi. Kópqabatty úılerdiń bir bóligi Pavlodardaǵy turǵyn úı kombınatynyń materıaldarynan salynady. Kásiporyn eki jyl buryn fınn tehnologııasy negizinde jumysyn bastady. Qazirgi kezde shaǵyn aýdanda ınjenerlik ınfraqurylymnyń qurylysy qatar júrgizilip jatyr.